सेना आमदाराच्या तक्रारीवर एसपींचे 'हे' उत्तर

सातारा : रस्त्यावरील गुन्ह्यांना आळा घालण्यासाठी सातारा शहरात 24 तास बीट मार्शल योजना राबविण्यास प्रारंभ करण्यात आला. पोलिस अधीक्षक तेजस्वी सातपुते, अतिरिक्‍त पोलिस अधीक्षक धीरज पाटील, सहायक पोलिस अधीक्षक समीर शेख यांच्यासह वरिष्ठ अधिकाऱ्यांच्या उपस्थितीत हिरवा झेंडा दाखविण्यात आला. साताऱ्यात हा प्रयोग यशस्वी झाल्यानंतर 15 दिवसांनंतर तो जिल्हाभरात राबविला जाईल, असे सातपुते यांनी सांगितले.

हेही वाचा - कासची उंची महाविकासच्या हाती ; हवा 60 कोटी निधी
 
पत्रकारांशी संवाद साधताना त्या म्हणाल्या, ""सोनसाखळी, वाहनचोरी, घरफोड्या, मारामारी आदी रस्त्यांवर घडणाऱ्या गुन्ह्यांना आळा घालण्यासाठी, तसेच त्यातील संशयितांना तत्काळ पकडण्यासाठी ही योजना राबवत आहे. यामध्ये सात दुचाकी असतील. प्रत्येकी चार कर्मचारी नियुक्‍त केले आहेत. शिवाय, दोन कर्मचारी राखीव ठेवले आहेत. शहरातील ठरवून दिलेल्या ठिकाणी ते पेट्रोलिंग करतील. त्यांच्या दुचाकीवर सायरन बसविला आहे. त्यामुळे नागरिकांत सतर्कता वाढेल, तसेच चोरांमध्ये भीती निर्माण होईल.''
 
साताऱ्यात हा प्रयोग 15 दिवस प्रात्यक्षिक स्वरूपात राबवून त्यानंतर कऱ्हाड, फलटण, वाई यासह तालुका पोलिस ठाणे असलेल्या ठिकाणी राबविला जाणार आहे. संबंधित कर्मचाऱ्यांच्या हजेरीसाठी क्‍यूआर कोडची यंत्रणा उभारली आहे. त्याद्वारे संबंधित कर्मचारी कोठे पेट्रोलिंग करत आहेत, त्याची माहिती सॉफ्टवेअरला प्राप्त होणार आहे, असेही त्यांनी सांगितले. 

"सीसीटीव्ही' प्रक्रियेमध्ये
 
शहरातील 53 ठिकाणी सीसीटीव्ही कॅमेरे बसविण्यासाठी दीड कोटी रुपये मंजूर झाले होते. त्यातील काही निधी इतरत्र वर्ग करण्यात आल्याने या कामासाठी 25 लाखांचा निधी मिळाला आहे. त्यानंतर सीसीटीव्ही बसविण्यासाठी नव्याने ठिकाणे निश्‍चित करून तसा प्रस्ताव वरिष्ठांकडे पाठविला आहे. त्याला मान्यता मिळाल्यानंतर त्याबाबत कार्यवाही होईल, असे श्रीमती सातपुते यांनी सांगितले. 


त्यावर भाष्य योग्य नाही 

आमदार शंभूराज देसाई यांनी अधिवेशनात तुम्ही राजशिष्टाचार पाळत नसल्याची तक्रार केली आहे. या प्रश्‍नावर त्या म्हणाल्या, ""त्यावर भाष्य करणे योग्य नाही. वरिष्ठांकडून आदेश मिळतील. त्यानुसार कार्यवाही करू.''

अवश्य वाचा - पोलिस अधीक्षक तेजस्वी सातपुतेंवर कारवाई ?