दुर्दैव; मृताच्या कुटुंबाला लाभ मिळवून देण्यासाठी घेतली लाच 

सांगली - वेजेगाव (ता. खानापूर) येथील दाजी पाटलोजी विद्यालयातील मृत शिपायाच्या कुटुंबाला कुटूंब निवृत्ती योजनेचा लाभ मिळवून देण्यासाठी एक हजाराची लाच स्वीकारताना येथील माध्यमिक शिक्षण विभागाच्या लिपीकासह तिघांना लाचलुचपत प्रतिबंध विभागाने अटक केली. 

हे पण वाचा - पारेकरवाडीत घडली एवढी मोठी घटना मात्र लोकप्रतिनिधी फिरकलेच नाहीत...

लिपीक पोपट रंगराव पडळकर (वय 54) याच्यासह शिक्षण विभागाचा निवृत्त लिपीक विश्वास गणपती पाटील (वय 59) आणि खानापूर तालुक्‍यातील दाजी पाटलोजी विद्यालयातील लिपीक सुभाष गंगाराम पोतदार (वय 54) अशी अटक करण्यात आलेल्या तिघांची नावे आहेत. 

अधिक माहिती अशी, की तक्रारदार यांचे भाऊ वेजेगाव (ता. खानापूर) येथील दाजी पाटलोजी विद्यालयातील शिपाई पदावर काम करणाऱ्या व्यक्तीचा गतवर्षी अपघाती मृत्यू झाला. त्याच्या पत्नीला कुटूंब निवृत्ती वेतनाचा लाभ देण्यासाठी दाजी पाटलोजी विद्यालयात अर्ज केला होता. शिक्षण विभागातील पोपट पडळकर यांनी एक हजार रूपये मागितल्याचे शाळेतील लिपीक सुभाष पोतदार याने तक्रारदार यांना सांगितले. त्यानंतर तक्रारदार यांनी लाचलुचपत प्रतिबंधक विभागात अर्ज दिला. त्यानुसार पडताळी करण्यात आली. त्यानुसार जिल्हा परिषदेच्या माध्यमिक शिक्षण विभागात पोलिसांनी सापळा रचला होता. पोतदार आणि पडळकर यांनी लाच मागितली आणि ती निवृत्त लिपीक पाटील याने स्वीकारत असताना पोलिसांनी या तिघांनाही रंगेहात पकडले. 

हे पण वाचा - त्या मारेकऱ्यांना मृत्यूदंड झालाच पाहिजे....

लाचलुचपत प्रतिबंधक विभागाचे पोलिस निरीक्षक गुरुदत्त मोरे आणि प्रशांत चौगुले यांच्या नेतृत्वाखाली पथकाने ही कारवाई केली. विश्रामबाग पोलीस ठाण्यात या तिघांवर गुन्हा नोंद करण्यात आला आहे.