अरे वा....! सोलापुरातील "डबेवाला' झाला न्यायाधीश 

सोलापूर ः "डबेवाला' हा शब्द ऐकला की मुंबईतील डबेवाले चेहऱ्यासमोर येतात. त्यांची शिस्त आणि कामातील वक्तशीरपणा तसेच नियोजनामुळे त्यांनी विश्‍वख्याती मिळवली आहे. त्यांच्याप्रमाणेच एकेकाळी घरोघरी मेसचे डबे पुरविणारे येथील रमेश येलदी यांनीही प्रतिकूल परिस्थितीत उत्तुंग यश मिळवले. नुकत्याच जाहीर झालेल्या स्पर्धा परिक्षांमध्ये ते जिल्हा न्यायाधीशाची परिक्षा उत्तीर्ण झाले आहेत. 

हे आधी वाचा... उपळाईची अनिता राज्यात प्रथम 

दुर्दम्य इच्छाशक्तीचे फळ 
माणसाकडे दुर्दम्य इच्छाशक्ती असली तर काहीही साध्य करु शकतो. अगदी असाच प्रकार येथील सुनील येलदी यांच्याबाबत झाला. येलदी यांना प्रतिकूल परिस्थितीमुळे शिक्षण घेण्यासाठी एकेकाळी "डबेवाला' म्हणून काम करावे लागले. आज ही व्यक्ती स्पर्धा परिक्षा उत्तीर्ण होऊन चक्क न्यायाधीश झाली आहे. दिवाणी न्यायाधीश कनिष्ठ स्तर तथा न्यायदंडाधिकारी प्रथम वर्ग या पदासाठी महाराष्ट्र राज्य लोकसेवा आयोगामार्फत घेण्यात आलेल्या परिक्षेत ते उत्तीर्ण झाले. 

अरे वा....सर्वात कमी वयात न्यायाधीश बनण्याचा मान आयेशाला 

पद्मशाली समाजातील चौथे न्यायाधीश 
सुनील येलदी यांच्या रुपाने पद्मशाली समाजाची चौथी व्यक्ती या पदावर आरुढ झाली आहे. सध्या ते सात-आठ वर्षांपासून सोलापूर जिल्हा न्यायालयात कनिष्ठ लिपीक म्हणून कार्यरत आहेत. त्यांनी दिवाणी न्यायाधीश कनिष्ठ स्तर तथा न्यायदंडाधिकारी प्रथम वर्ग या पदाची परिक्षा दिली आणि त्यात यश मिळविले. याआधी पद्मशाली समाजाचे विष्णू दासरी, उषा इंदापुरे, अनिल गुन्नाल असे तीन जण या परिक्षेत उत्तीर्ण होऊन पदावर रूजू झाले आहेत. 

अभिमानास्पद... स्वच्छता कर्मचाऱ्याचा मुलगा झाला न्यायाधीश 

वडील गिरणीकामगार, आई विडी कामगार 
येलदी यांचे वडील लक्ष्मीपती हे सोलापूर सूत गिरणीत काम करीत. आई लक्ष्मीबाई या विडी कामगार. गिरणी बंद पडल्यावर लक्ष्मीपती यांना कठिण दिवस काढावे लागले. याच काळात सुनील हे बीएससीचे शिक्षण घेत होते. घरची आर्थिक परिस्थिती नीट नसल्याने सुनील हे काही काळ केबल रिपेअरींगचे काम केले. नंतर मेसचे डबे पुरविण्याचे कामही त्यांना करावे लागले. जिद्दीने त्यांनी पदवीचे शिक्षण पूर्ण केले. 

शिकत असताना लागली नोकरी 
श्री. येलदी एलएलबीचे शिक्षण घेत असताना त्यांना जिल्हा न्यायालयात कनिष्ठ लिपीकची नोकरी लागली. नोकरी लागल्यावर आपण आणखीन शिकून न्यायाधीश पदावर जावे असे त्यांचे स्वप्न होते. एलएमएमचे शिक्षणही पूर्ण केल्यानंतर त्यांनी एमपीएससी या स्पर्धा परिक्षेची तयारी केली. अखेर या परिक्षेत उत्तीर्ण होण्याचे त्यांचे स्वप्न पूर्ण झाले. येलदी यांचे शालेय शिक्षण अहिल्याबाई प्रशालेत, कनिष्ठ महाविद्यालयीन शिक्षण हे कुचन प्रशालेत, बीएससीचे शिक्षण वालचंद कॉलेज तर एलएलबी-एलएलएमचे शिक्षण दयानंद विधी महाविद्यालयात झाले आहे.