सांगली जिल्ह्यात तीन व्यक्तींमागे एक वाहन; नऊ वर्षांत दुप्पट वाढ

सांगली : जिल्ह्यातील वाहन संख्या वाढीचा वेग गेल्या दहा वर्षांपासून वाढत आहे. रोज 150 नवी वाहने रस्त्यांवरून धावत आहेत. जिल्ह्यातील लोकसंख्येची तुलना करता नऊ वर्षांपूर्वी सहा व्यक्तींमागे एक वाहन असे प्रमाण होते. सध्या लोकसंख्या 30 लाखांहून अधिक आहे; तर वाहनसंख्येनेही दहा लाखांचा टप्पा ओलांडला आहे. त्यामुळे तुलना करता तीन व्यक्तींमागे एक वाहन असे प्रमाण आहे. 

गेल्या 20 वर्षांपासून वाहनांची संख्या वाढतच आहे. 20 ते 25 वर्षांपूर्वीचे चित्र पाहिले, तर महाविद्यालय परिसर असो, की एखादी कंपनी, कारखाना परिसर असो, तेथे सायकली लावण्यासाठी स्टॅंड असायचे. परंतु या सायकल स्टॅंडची जागा सध्या दुचाकींनी घेतल्याचे चित्र कॉलेज, कंपनी, कारखाने आदी परिसरात पहायला मिळते. 20 वर्षांपूर्वी दारात दुचाकी म्हणजे स्टेटस्‌चा विषय असायचा, तसेच दुचाकीसाठी बॅंका, अर्थसहाय्य कंपन्यांचे कर्ज मिळवणे म्हणजे दिव्यच असे. परंतु लोकांची मागणी आणि बॅंका, अर्थसहाय्य कंपन्यांची गरज लक्षात घेऊन त्यात गेल्या काही वर्षांत सुटसुटीतणा आला आहे. वाहनांसाठी सहज कर्ज मिळू लागल्यामुळे अनेकांच्या दारात सध्या दुचाकी पाहायला मिळतात. तोच प्रकार रिक्षा, मालवाहतूक गाड्या, ट्रॅक्‍टर, ट्रक आदी गाड्यांच्या बाबतीत दिसतो. 

जिल्ह्यातील अपवाद वगळता रस्त्यांची अवस्था तीच आहे. रूंदीकरण फारसे झाले नाही. मात्र या रस्त्यांवरून धावणाऱ्या सर्व प्रकारच्या गाड्यांची संख्या वाढली आहे. अनेक रस्त्यांवर दिवसभर ट्रॅफिक जामचा अनुभव येतो. नऊ वर्षांपूर्वी जिल्ह्यातील सर्व प्रकारच्या वाहनांची संख्या 5 लाख 20 हजार होती. सध्या वाहनसंख्येने दहा लाखांचा टप्पा पूर्ण केला आहे. तुलनाच केली, तर नऊ वर्षात वाहनसंख्या दुपटीने वाढली. सहा व्यक्तींमागे एक वाहन हे प्रमाण आता तीन व्यक्तींमागे एक वाहन असे बनले आहे. 

दुचाकी संख्या साडेसात लाखांवर 
जिल्ह्यातील वाहन संख्येत सर्वाधिक संख्या दुचाकींची आहे. डिसेंबर 2020 अखेर दुचाकींची संख्या 7 लाख 54 हजार 213 होती. गेल्या अडीच महिन्यात त्यात आणखी भर पडली आहे. 

दुचाकींची संख्या 

• बाईक : 6 लाख 14 हजार 75 
• स्कुटर प्रकार : 88 हजार 342 
• मोपेड : 51 हजार 786 

मोटारींचा वेग जास्त 
वाहनसंख्या वाढीचा विचार केला, तर सर्वाधिक मोटारसंख्या वाढीचा वेग जास्त आहे. नऊ वर्षांपूर्वी 36 हजार 791 इतक्‍या मोटारी होत्या. सध्या डिसेंबर अखेर 97 हजार 328 मोटारी झाल्या आहेत. तुलनाच केली, तर अडीच ते पावणे तीन पटीने मोटारी वाढल्या आहेत. दुचाकीपेक्षा मोटार दारात असणे स्टेटस्‌चा विषय बनला आहे. 

जिल्ह्यातील वाहनांची संख्या

संपादन : युवराज यादव