दारूबद्दल बोलल्याचा त्याला असा आला राग; त्याने थेट आई, मुलावरच...

पिंपरी : लॉकडाउनमध्ये महसूल वाढविण्यासाठी सरकारने दारूचा जणू जीवनावश्‍यक वस्तूंमध्येच समावेश केल्याने मद्यपींनी पोटाला अन्न खाण्यापेक्षा दारूलाच अधिक महत्व दिल्याचे दिसून येत आहे. अशीच घटना भोसरी येथे घडली. 'घरात खायला काही नाही आणि तु दारू कशाला घेऊन आला', असे म्हटल्याच्या कारणावरून मद्यपी मुलाने आपल्या स्वत:च्या आई व मुलावर सत्तूरने वार करून मारहाण केली. 

ताज्या बातम्यांसाठी डाऊनलोड करा ई-सकाळचे ऍप

लॉकडाउनमध्ये हाताला काम नसल्याने अनेकांपुढे आर्थिक संकट उभे राहिले आहे. पोटाची भूक भागविण्याची चिंता सतावत आहे. अशातच सरकारने महसूल वाढविण्यासाठी दारूची दुकाने सुरू करण्याचा निर्णय घेतला. ही बाब मद्यपींसाठी आनंददायी ठरली. दारूच्या दुकानांपुढे लांबलचक रांगा लागल्या. दारू पिऊन झिंगाट होण्यासाठी घरात खायला अन्न नाही, याचाही विचार न करता अनेकांनी दारू खरेदीला प्राधान्य दिले. सध्या मद्यपींना कुटुंबीयांच्या पोटाची भूक भागविण्यापेक्षाही स्वत:साठी दारू घेणे महत्वाचे वाटत आहे. भोसरीत तर एकाने दारूसाठी स्वत:च्या आई व मुलावर वार केल्याची धक्कादायक घटना घडली. 

पिंपरी चिंचवडच्या बातम्या वाचण्यासाठी येथे ► क्लिक करा

पुण्याच्या बातम्या वाचण्यासाठी येथे ► क्लिक करा 

धनराज रंगनाथ झाडे (वय 38, रा. लांडेवाडी झोपडपट्टी, भोसरी) असे अटक केलेल्या आरोपीचे नाव आहे. याप्रकरणी आरोपीची आई कौशल्या रंगनाथ झाडे यांनी फिर्याद दिली. रविवारी (ता. 10) रात्री आरोपी धनराज घरी आला, त्यावेळी त्याने सोबत दारू आणली होती. त्यामुळे त्याची आई कौशल्या या त्याला 'घरात खायला काही नाही आणि दारू का घेऊन आला' म्हणाल्या. याचा राग आल्याने धनराज याने आई कौशल्या यांना शिवीगाळ करीत लाथाबुक्‍क्‍यांनी मारहाण केली. त्यानंतर सत्तूरने कौशल्या यांच्या हातावर वार केले. त्यात कौशल्या जखमी झाल्या. त्यानंतर स्वत:च्या मुलावरही वार करून जखमी केले. भोसरी एमआयडीसी पोलिसांनी आरोपीला अटक केली असून अधिक तपास सुरू आहे.