पिंपरी-चिंचवड पोलिसांकडून कडेकोट बंदोबस्ताचा नुसताच गाजावाजा; प्रत्यक्षात मात्र...

पिंपरी : लॉकडाउनची काटेकोरपणे अंमलबजावणी व्हावी, यासाठी शहरात ठिकठिकाणी नाकाबंदी करण्यात आली. मात्र, काही नाकबंदीच्या ठिकाणी केवळ एक, दोन बॅरिकेड शिवाय पोलिस कर्मचारीही नजरेस पडत नसल्याने वाहने बिनधास्तपणे ये-जा करीत होते. ना कसली तपासणी, ना चौकशी त्यामुळे पिंपरी-चिंचवडच्या काही भागात नाकाबंदी केवळ नावापुरतीच असल्याचे दिसून आली. 

ताज्या बातम्यांसाठी डाऊनलोड करा ई-सकाळचे ऍप 

कडक लॉकडाउन असल्याने शहरात नाकाबंदीसह कडेकोट बंदोबस्त तैनात असणार असल्याचा सोमवारी मोठा गाजावाजा करीत पोलिसांकडून सांगण्यात येत होते. शहरात प्रवेश करणाऱ्या ठिकाणांसह अंतर्गत भागात 66 ठिकाणी नाकाबंदी असल्याचे सांगितले जात होते. मात्र, प्रत्यक्षात मंगळवारी अनेक ठिकाणी नाकाबंदी सैल असल्याचे दिसून आले. काही ठिकाणी केवळ बॅरिकेड उभारले होते. मात्र, पोलिसांचा पत्ताच नव्हता. तळवडे येथून शहरात प्रवेश होतो. मात्र, याठिकाणच्या तळवडे चौकात केवळ दोन बॅरिकेड उभारल्याचे मंगळवारी दुपारी दिसून आले.

पिंपरी-चिंचवडच्या बातम्या वाचण्यासाठी येथे ► क्लिक करा

बिनधास्तपणे वाहने ये-जा करीत होती. अशीच परिस्थिती ज्योतिबानगर येथील चेकपोस्ट, चिंचवड स्टेशन चौक, चऱ्होली फाटा आदी ठिकाणी पहायला मिळाली. त्यामुळे भागात वाहनचालकांसह पादचाऱ्यांचीही गर्दी पहायला मिळाली. बिनधास्तपणे नागरिक वावरत होते. तर काही भागात नाकाबंदीच्या ठिकाणी वाहनांची काटेकोरपणे तपासणी केली जात होती. पिंपरीतील डॉ. बाबासाहेब आंबेडकर चौक, भोसरी एमआयडीसीतील यशवंतनगर चौक, भोसरीतील पीएमटी चौक, श्री तिरूपती बालाजी चौक, दिघीतील बोपखेल फाटा, देहूफाटा, टेल्को रोड, मामुर्डीतील मुकाई चौक, दापोडी आदी ठिकाणी वाहनांची तपासणी केली जात होती. 

आरटीओ कार्यालयात तुमची अपॉइंटमेंट आहे का? पण लॉकडाउनमध्ये कसं करणार? वाचा

नागरिकांनी घेतला अंदाज 

सकाळपासून दुपारपर्यंत नागरिकांनी परिस्थितीचा अंदाज घेतला. यापूर्वीच्या लॉकडाउनवेळी पोलिस बंदोबस्त असलेल्या ठिकाणची माहिती घेतली. तसेच, सध्या त्याठिकाणी पोलिस नसल्याचे समजल्यानंतर नागरिकही घराबाहेर पडू लागले. त्यामुळे काही परिसरात दुपारनंतर वर्दळ वाढल्याचे दिसून आले.