बिल्डरने कामाचे पैसे न दिल्याने ठेकेदाराची विष पिऊन आत्महत्या

पिंपरी - बिल्डरने (Builder) बांधकाकामाचे (Construction) पैसे (Money) न देता फसवणूक (Cheating) केल्याने ठेकेदाराने विषप्राशन (Poision) करून आत्महत्या (Suicide) केली. ही घटना चिंचवड स्टेशन येथे घडली. ठेकेदाराला आत्महत्येस प्रवृत्त केल्याप्रकरणी बांधकाम व्यावसायिकासह त्याच्या साथीदारांवर गुन्हा दाखल झाला आहे.

राजेश जगदीशप्रकाश अगरवाल, संतोष रामअवतार अगरवाल, राहूल भंडारी, अजित सुभाष गायकवाड, अभिजित गायकवाड, सचिन किल्लेदार, ललित जैन व इतर अशी गुन्हा दाखल झालेल्या आरोपींची नावे आहेत. तर प्रविण पंडीत पाटील असे आत्महत्या केलेल्या ठेकेदाराचे नाव आहे. याप्रकरणी त्यांचे मेहुणे विनोद भाऊराव पाटील (रा. जळगाव) यांनी निगडी पोलिस ठाण्यात फिर्याद दिली आहे. या बिल्डरच्या तीन प्रकल्पाच्या ठिकाणी प्रवीण पाटील यांनी ठेकेदारी पद्धतीने काम घेतले होते. या कामाचे त्यांना आरोपींकडून एक कोटी ९४ लाख एक हजार ६१६ रुपये येणे बाकी होते. मात्र, आरोपींनी काम झाल्यानंतरही प्रवीण यांना कामाचे पैसे न देता त्यांची फसवणूक करीत धमकी दिली.

दरम्यान, प्रवीण हे चिंचवड स्टेशन येथील आरोपींच्या कार्यालयासमोर बसून राहिले. तरीही पैसे न मिळाल्याने बुधवारी (ता. २५) सकाळी त्यांनी विष प्राशन केले. उपचारासाठी त्यांना खासगी रुग्णालयात दाखल केले. मात्र, उपचारादरम्यान त्यांचा मृत्यू झाला.

दरम्यान, प्रवीण यांची फसवणूक करून त्यांना आत्महत्येस प्रवृत्त केल्याप्रकरणी आरोपींवर गुन्हा दाखल झाला आहे.