पिंपरी-चिंचवडमध्ये घरफोडीच्या घटना वाढल्या; चिंचवड, दिघीत भरदिवसा चोरी

पिंपरी : चिंचवड व दिघी येथे भरदिवसा घरफोडीच्या दोन घटना घडल्या. यामध्ये चोरट्यांनी सव्वा दोन लाखांचा ऐवज लंपास केला. 

ताज्या बातम्यांसाठी डाऊनलोड करा ई-सकाळचे ऍप

पिंपरी-चिंचवडच्या बातम्या वाचण्यासाठी येथे ► क्लिक करा 

चिंचवड येथील घटनेप्रकरणी हनुमान राजेभाऊ सटाले (रा. पांडुरंग निवास, नंदनवन सोसायटी, मातोश्रीनगर, वाल्हेकरवाडी, चिंचवड) यांनी फिर्याद दिली. शुक्रवारी (ता. 9) फिर्यादी हे घराला कुलूप लावून कुटुंबीयांसह गावी गेले होते. त्यादरम्यान, अज्ञात चोरटा कशाच्या तरी सहाय्याने दरवाजाचे कुलूप तोडून घरात शिरला. बेडरूममधील लोखंडी कपाटाचे लॉक तोडून त्यातील 78 हजार रुपये किमतीचे सोन्याचे नेकलेस, पदक व तीन हजारांची रोकड, असा एकूण 81 हजारांचा ऐवज लंपास केला. ही घटना दुपारी बारा ते सायंकाळी साडेसातच्या सुमारास घडली. याप्रकरणी चिंचवड पोलिस ठाण्यात गुन्हा दाखल असून, पोलिस अधिक तपास करीत आहेत. 

पुण्याच्या बातम्या वाचण्यासाठी येथे ► क्लिक करा

दुसरी घटना दिघी येथे घडली. याप्रकरणी दीपाली काशिनाथ दिपके (रा. श्रमदीप बिल्डिंग, गुरूदत्त कॉलनी नं. 2, साईपार्क, दिघी) यांनी फिर्याद दिली. शनिवारी (ता. 10) दुपारी दोनच्या सुमारास फिर्यादी या घराला कुलूप लावून बाहेर गेल्या होत्या. तेव्हा दरवाजाचे कुलूप तोडून चोरटा आत शिरला. एक लाख रूपये किमतीचे सोन्याचे दागिने, 35 हजारांची रोकड, दोन हजारांचे घड्याळ व अकरा हजार रुपये किमतीचा मोबाईल, असा एकूण एक लाख 48 हजारांचा ऐवज लंपास केला. ही घटना सायंकाळी साडेचारच्या सुमारास उघडकीस आली. याप्रकरणी दिघी पोलिस ठाण्यात गुन्हा दाखल असून, पोलिस अधिक तपास करीत आहेत.