पॉलिसीमध्ये गुंतवणूक केल्यास चांगले उत्पन्न मिळवून देण्याचे आमिष दाखवून ज्येष्ठाची फसवणूक

पिंपरी : पॉलिसीमध्ये गुंतवणूक केल्यास चांगले उत्पन्न मिळवून देण्याचे आमिष दाखविले. त्यानंतर इन्कम टॅक्स, पोलिस अधिकारी असल्याचे भासवून एका ज्येष्ठ नागरिकाची एक कोटी ८५ लाखांची फसवणूक केली. या प्रकरणी आप्पासाहेब पांडुरंग मिठारी (रा. पाचपीर चौक, कोकणेनगर, काळेवाडी ) यांनी फिर्याद दिली आहे. त्यानुसार मनीष मेहता, संजय कुलकर्णी, गणेश ठाकूर, पियुष, अनिकेत, विलास शाखापुरे, नरेंद्र प्रसाद यादव, सतीश पाटील, संतोष रायकर, राहुल सावंत, प्राची मॅडम, श्रुती अग्रवाल, हरीश रेड्डी, सदाशिव रामचंद्र पाटील (रा. घाटकोपर) यांच्यावर गुन्हा दाखल झाला आहे.

आरोपींनी ऍगॉन रिलीगिअर लाइफ इन्शुरन्स, रिलायन्स लाइफ इन्शुरन्स कंपनीच्या पॉलिसी घेण्यासाठी तगादा लावला. तसेच त्यामध्ये गुंतवणूक केल्यास चांगला इन्कम मिळवून देतो, असे आमिष फिर्यादी यांना दाखविले. त्यानंतर फिर्यादी यांच्या खात्यावरील रक्कम जास्त असल्याची सांगून इन्कमटॅक्स डिपार्टमेंट, आयआरडीए ब्रांच मॅनेजर, क्राईम ब्रांच पोलिस अधिकारी असल्याचे भासवून फिर्यादीला भीती घातली.

तसेच वेगवेगळी कारणे सांगून, खोटी कागदपत्रे बनवून फिर्यादीचा विश्वास संपादन केला. त्यानंतर वेगवेगळ्या मोबाईल क्रमांकावरून फोन करून फिर्यादीकडून वेळोवेळी रोख स्वरूपात ३९ लाख ७१ रुपये घेत विविध बँकेच्या खात्यावर व चेकद्वारे एक कोटी ४५ लाख ३४ हजार ६६ रुपये भरण्यास भाग पाडले. अशाप्रकारे आरोपींनी एकूण एक कोटी ८५ लाख ५ हजार ६६ रुपयांची फसवणूक करून, या रकमेचा अपहार केला. याप्रकरणी वाकड पोलिस ठाण्यात गुन्हा दाखल असून पोलिस अधिक तपास करीत आहेत.