हिंजवडीत आयटीत आढळले उदमांजर; प्राणी मित्रांनी सोडले जंगलात

हिंजवडी - भटकंती करता-करता हिंजवडी फेज-३ येथील एका कंपनीच्या कॅन्टीनमध्ये घुसलेल्या उदमांजराला प्राणी मित्रांनी कोणतीही इजा होऊ न देता अलगत शिताफीने पकडुन पौड वन अधिकाऱ्यांच्या सुचनेनुसार त्याला जंगलात सोडून जीवदान देण्यात आले.

रविवारी (ता. २५) रात्री ८. ३० वाजता सर्पमित्र अजित भालेराव यांना फोन आला की मांजरासारखा दिसणारा कुठला तरी प्राणी कँटीनमध्ये शिरला आहे.

भूतकर यांनी ही माहिती वाईल्ड अँनिमल्स अँण्ड स्नेक्स प्रोटेक्शन सोसायटी संस्थेतील सर्परक्षक तुषार पवार, शेखर महाराज जांभूळकर तसेच गणेश भुतकर यांना दिली. त्यानुसार या प्राणीमित्रांची सर्व टीम घटनास्थळी दाखल झाली. पाहणी केली असता ते जंगली उदमांजर (Civet Cat) असल्याचे निष्पन्न झाले. त्याचे वजन ५ किलो व उंची गुडघ्याच्या मानवी खालोखाल होती. याबाबत मुळशीचे वनरक्षक पांडूरंग कोपनर यांना ही माहिती देण्यात आली.

त्यांच्या सूचनेनुसार उदमांजराला पकडून जंगलात सुरक्षितपणे सोडण्यात आल्याने प्राणी मित्रांचे उपस्थितांनी आभार मानत कौतुक केले. दुर्मिळ होत चाललेले उदमांजर हा सस्तन व सर्वहारी प्राणी आहे. उंदरासारखे लहान प्राणी, पक्षी, कीटक, फळे, खेकडे हे त्याचे खाद्य आहे.

निशाचर उदमांजराच्या अंगावर काळसर, राखाडी केस व लहान काळ्या ठिपक्यांच्या रेषा असतात. शेपटी काळपट व झुपकेदार असते मानवी वस्तीजवळ व जंगलामध्ये आढळतो. सहसा दिवसभर झाडांवरील ढोलीमधे आराम करून रात्रीच्यावेळी हा प्राणी खाद्य शोधण्यासाठी बाहेर पडतो.