Dr. Bhimrao Ambedkar : समाजाने बुद्ध विहाराबरोबरच शाळांचीही निर्मिती केली पाहिजे

भोसरी - सध्या बुद्धविहारे आखीव-रेखीव निर्माण होत आहेत. हे बौद्ध समाजाचे प्रतिबिंब आहे. बौद्ध समाज हा प्रगतीपतावर असून तो घेणारा नाही तर देणारा होत आहे, ही आनंदाची बाब आहे. बुद्ध विहारे ही धम्माबरोबरच ज्ञानाचीही केंद्रे झाली पाहिजेत.

समाजाने बुद्ध विहाराबरोबरच शाळांचीही निर्मिती केली पाहिजे असे मत विश्वरत्न डॉ. बाबासाहेब आंबेडकर यांचे नातू व भारतीय बौद्ध महासभेचे राष्ट्रीय कार्याध्यक्ष डॉ. भीमराव आंबेडकर यांनी मोशी प्राधिकरणात व्यक्त केले.

मोशी प्राधिकरणातील संतनगरमधील धम्मदीप बुद्ध विहारात तथागत गौतम बुद्ध रुपाची प्रतिष्ठापना विश्वरत्न डॉ. बाबासाहेब आंबेडकर यांचे नातू डॉ. भीमराव आंबेडकर यांच्या हस्ते झाली. या वेळी आमदार महेश लांडगे, भदंत धम्मानंद महाथेरो, माजी नगरसेवक संजय वाबळे, विलास मडिगेरी, विकास डोळस, नम्रता लोंढे, सीमा सावळे, धम्मभूषण सुरेश कसबे, पिंपरी-चिंचवड बौद्ध समाज विकास महासंघाचे अध्यक्ष भाऊसाहेब डोळस आदिंनी शुभेच्छा दिल्या.

या वेळी सामाजिक कार्यकर्ते मानव कांबळे, योगेश लोंढे, संजय बनसोडे, प्रकाश ओव्हाळ, गोकुळ गायकवाड, राधाकांत कांबळे, रेखा ढेकळे, अॅड. एस. के. भंडारे, पोपट भालेराव, दिलीप कदम आदी उपस्थित होते. कार्यक्रमाच्या अध्यक्षस्थानी अशोक सरतापे होते. या वेळी सामुदायिक बुद्धवंदना व अन्नदानाचे कार्यक्रम झाले.

डॉ. भीमराव आंबेडकर पुढे म्हणाले, 'सम्राट अशोकासह मौर्य कुळातील बौद्ध राजांनी अखंड भारतावर बाराशे वर्षाच्या केलेल्या दैदिप्यमान राज्यकारभाराचा इतिहास सांगितला गेला पाहीजे. त्याकाळची नालंदा, तक्षशिलासारखी नऊ जागतिक विद्यापिठे नष्ट झाली नसती तर आज भारताने जगाचे नेतृत्व केले असते."

कार्यक्रम यशस्वी करण्यासाठी सोपान इंगळे, शितल कांबळे, शहाजी कांबळे, राजेश नितनवरे, मृणालिनी डंभारे, सि‌द्धार्थ आव्हाड, साधना सिरसाट, दत्तात्रय शिंदे, शाहुजी भोसले, बाळासाहेब सिरसाट, वि‌द्याधन गेडाम आदिंसह धम्मदीप बुद्धविहाराच्या सदस्यांनी परिश्रम घेतले.