गुन्हे वृत्त

वाहनाच्या धडकेत
पादचारी तरुण जखमी
पिंपरी : भरधाव अज्ञात वाहनाने दिलेल्या धडकेत पादचारी तरुण गंभीर जखमी झाला. ही घटना भांबोली ते वराळे रस्त्यावर घडली. शक्तिमान चंद्रिका प्रसाद (वय १९, रा. भांबोली) असे या अपघातात जखमी झालेल्या तरुणाचे नाव आहे. त्यांनी म्हाळुंगे एमआयडीसी पोलिस ठाण्यात दिलेल्या फिर्यादीनुसार अज्ञात आरोपीवर गुन्हा दाखल झाला आहे. फिर्यादी हे पायी घरी जात असताना पाठीमागून आलेल्या दुचाकीने त्यांना धडक दिली. अपघातानंतर दुचाकीचालक घटनास्थळावरून पसार झाला.
------------------
आर्थिक फायद्याचे आमिष दाखवत
दोन लाखांची फसवणूक
ऑनलाइन जॉब केल्यास आर्थिक फायद्याचे आमिष दाखवून एकाची दोन लाख रुपयांची फसवणूक केली. याप्रकरणी तळेगाव, विद्याविहार कॉलनीतील ३२ वर्षीय व्यक्तीने तळेगाव दाभाडे पोलिस ठाण्यात फिर्याद दिली आहे. त्यानुसार जॉसलीन नावाच्या व्यक्तीवर गुन्हा दाखल झाला आहे. आरोपीने फिर्यादीशी सोशल मीडियाच्या माध्यमातून संपर्क साधला. ऑनलाइन जॉब केल्यास अधिकच्या आर्थिक फायद्याचे आमिष दाखवून फिर्यादीचा विश्वास संपादन केला. त्यानंतर फिर्यादीची दोन लाख दोन हजार रुपयांची ऑनलाइन आर्थिक फसवणूक केली.
----------------------------------------------
कोयता बाळगल्याप्रकरणी
एकाला अटक
तळवडे : बेकायदा कोयता बाळगल्याप्रकरणी एकाला निगडी पोलिसांनी अटक केली. ही कारवाई तळवडे, शरदनगर येथील कृष्णानगर झोपडपट्टी येथे करण्यात आली. सुजल उत्तरेश्वर पोटभरे (वय २०, रा. कृष्णानगर झोपडपट्टी, शरदनगर, तळवडे) असे आरोपीचे नाव आहे. निगडी पोलिस अधिक तपास करीत आहेत.
----------------------
बेकायदा दारूविक्री
प्रकरणी एकावर गुन्हा
पिंपरी : बेकायदा दारू विक्रीप्रकरणी राहुल फुलचंद नट (वय २३, रा. वाकडकर वस्ती, वाकड) याच्यावर हिंजवडी पोलिसांनी गुन्हा दाखल केला आहे. त्याच्याकडून नऊ हजार रुपये किमतीचा मुद्देमाल जप्त केला आहे. हिंजवडी पोलिस अधिक तपास करीत आहेत.