Video :...अन् पुणे ते पंढरपूरपर्यंतचा प्रवास केला बारा तासांत!

पिंपरी : सायकलपटू अजित पाटील यांनी घरी राहून जीपीएस उपकरणाच्या आधारे पुणे ते पंढरपूर अशी एकदिवसीय व्हर्च्युअल राईड बारा तास सायकलिंग करत पूर्णत्वाला नेली. ऑनलाइन उपकरणाच्या आधारे पहिल्यांदाच व्हर्च्युअल राईड आयोजित करण्यात आली होती. 

ताज्या बातम्यांसाठी डाऊनलोड करा ई-सकाळचे ऍप   

इंडो ऍथलेटिक्‍स सोसायटीने (आयएएस) त्यांच्या सर्व सदस्यांसाठी यंदाच्या वर्षी पुणे ते पंढरपूर अशी सायकलवारी रद्द करून आयएएस फिटनेस वारी आयोजित केली होती. त्याला संस्थेच्या सदस्यांनी सर्व नियमांचे पालन करत घरातूनच किंवा जवळपासच्या भागांत व्यायाम प्रकार करत उत्स्फूर्त प्रतिसाद दिला. आयएएसचे संस्थापक-सदस्य अजित पाटील यांनीही सायकल ट्रेनर वापरून घरातूनच ट्रेनरला जोडलेल्या जीपीएस उपकरणाच्या आधारे पुणे ते पंढरपूर अशी व्हर्च्युअल राईड पूर्ण केली. सकाळी सहा वाजता त्यांनी राईडला सुरुवात केली. जेवण, नाष्टा यासाठी विश्रांती घेत त्यांनी रात्री 9 वाजेपर्यंत ही राईड पूर्ण केली. प्रत्येक तासाला साधारणतः सरासरी 20 किलोमीटर या वेगाने त्यांनी 237 किमीचे अंतर पूर्ण केले. त्याबद्दल, संस्थेच्या सर्व सदस्यांनी त्यांचे अभिनंदन केले. 

पिंपरी चिंचवडच्या बातम्या वाचण्यासाठी येथे ► क्लिक करा

पाटील म्हणाले, "यावेळेस सायकलवारी झाली नाही. त्यामुळे मला चुकल्यासारखे वाटत होते. वेगळा अनुभव मिळावा, यासाठी व्हर्च्युअल वारी केली. एका जागेवर बसून सायकलिंग करणे अवघड असते. मी यापूर्वी चार तास सायकलिंग केली होती. गाणी ऐकत, जुने फोटो पाहत आणि मित्रांशी फोनवरून बोलत राईड पूर्ण केली.''

पुण्याच्या बातम्या वाचण्यासाठी येथे ► क्लिक करा