‘हरे राम’, ‘हरे कृष्ण’चा नामघोष; रावेतला ‘इस्कॉन’तर्फे भगवान जगन्नाथ रथयात्रा उत्साहात

आकुर्डी : फुलांनी सजवलेला रथ..., त्यात विराजमान भगवान जगन्नाथ अर्थात भगवान श्रीकृष्ण, बंधू बलराम व भगिनी सुभद्रा यांच्या मूर्ती. आकर्षक रांगोळ्यांच्या पायघड्या, भगवे झेंडे. टाळ-मृदंगाच्या गजरात ‘हरे राम, हरे राम, राम राम, हरे हरे। हरे कृष्ण, हरे कृष्ण, कृष्ण कृष्ण, हरे हरे।’ या भजनात तल्लीन भाविक अशा भक्तिमय वातावरणात रावेत येथील इस्कॉन मंदिरातर्फे जगन्नाथ रथयात्रा काढण्यात आली.

रावेत येथील इस्कॉन मंदिरात तीन दिवस जगन्नाथ कथा आणि रथयात्रा महोत्सवाचे आयोजन केले होते. रथयात्रेत सहभागी भाविक नामजपात तल्लीन झाले होते. लहान मुलांनाही अध्यात्मामध्ये रुची निर्माण व्हावी, यासाठी लहान मुलांसाठीच जगन्नाथ रथयात्रा महोत्सव काढण्यात आला होता. मंत्र, जप, भजन, कीर्तन यामुळे संपूर्ण वातावरण मंगलमय झाले होते. रथयात्रा मार्गस्थ होऊ झाल्यानंतर भाविकांनी रस्त्याच्या दुतर्फा थांबून दर्शन घेतले. समाजामध्ये शांतता प्रस्थापित व्हावी, एकमेकांमध्ये प्रेम बंधुभाव निर्माण व्हावा, यासाठी भगवान जगन्नाथांची सेवा आणि रथयात्रा महोत्सवाचे आयोजन केले होते.

गोविंद धाम मंदिरातून सायंकाळी पाच वाजता रथयात्रेला प्रारंभ झाला. वृंदावन सोसायटी, विशाल डायमंड सोसायटी, सोनिगरा अंगण, साई सरोज अपार्टमेंट, मंदिराच्या मागील एमआयडीसी रोड, माधव मिठास, शिंदे वस्ती, हिल टॉप सोसायटी आणि पुन्हा गोविंद धाम मंदिर असा या रथयात्रेचा मार्ग होता. रथयात्रेनंतर मंदिरात महाआरती झाली. महाप्रसादाचे वाटप केले. मंदिरातही फुलांची सुंदर आरास केली होती. शुक्रवारी (ता. १) गजवेश दर्शन कार्यक्रम झाला. शनिवारी (ता. २) ५६ भोग उत्सव संपन्न झाला. रविवारी जगन्नाथ रथयात्रा काढण्यात आली, असे गोपतीदास प्रभुजी यांनी सांगितले.