पिंपरीतील 'या' बँकेचं तीन दिवसांपासून सर्व्हर डाउन; नागरिकांना मनस्ताप 

पिंपरी : मोरवाडीतील बॅंक ऑफ महाराष्ट्र शाखेचे सर्व्हर गेल्या तीन दिवसांपासून डाउन झाल्याने कामकाज बंद होते. आर्थिक व्यवहार ठप्प झाल्याचा मनस्ताप हजारो खातेदारांना सहन करावा लागला. खातेधारकांबरोबरच बॅंकेचे अधिकारी आणि कर्मचारीही या प्रकाराने वैतागले होते. 

ताज्या बातम्यांसाठी डाऊनलोड करा ई-सकाळचे ऍप 

या बॅंकेतून दररोज जवळपास कोट्यवधी रुपयांची उलाढाल असल्याने मोठी गर्दी असते. परंतु या बॅंकेचे सर्व्हर गुरुवारी अचानक बंद पडले. सकाळी बॅंका उघडल्यानंतर कामकाजाला सुरुवात झाली. मात्र, सर्व्हरला येणारी कनेक्‍टिव्हिटी कमी - अधिक प्रमाणात येत होती. त्यामुळे आर्थिक व्यवहार करताना वेळ लागत होता. या सर्व तांत्रिक अडचणीमुळे बॅंकेचे कामकाज वेळेत पूर्ण होत नव्हते. त्याचवेळी खातेदारांची गर्दी वाढत होती. सकाळपासून बॅंकेत येणाऱ्या खातेधारकांना रक्कम मिळत नसल्याने ओरड सुरू झाली होती. पैसे भरणे, पैसे काढणे, पैसे पाठवणे, खात्याची चौकशीसारखी कामे खोळंबली. 

पिंपरी-चिंचवडच्या बातम्या वाचण्यासाठी येथे ► क्लिक करा

काही ग्राहकांची रक्कम ट्रान्स्फर झालेली नाही, धनादेश वटविले गेले नाही. त्यासह एका एका कामासाठी तीन-तीन वेळा नोंदणी करावी लागत होती. तासन्‌तास रांगेत ताटकळत थांबत लागत असल्याने ज्येष्ठ नागरिक, महिला खातेदार हैराण झाले होते. या बाबत खातेधारकांनी बॅंकेच्या मुख्य व्यवस्थापकांकडे धाव घेतली. पण त्यांच्याकडून समाधानकारक उत्तर न मिळाल्याने त्यांनी "सकाळ'कडे तक्रारी केल्या. 

पुण्याच्या बातम्या वाचण्यासाठी येथे क्लिक करा

काही दिवसांपासून कनेक्‍टिव्हिटी नसल्याबाबत बीएसएनएल व आउटसोर्सिंग कंपनीतील अधिकाऱ्यांना कळविले आहे. शुक्रवारी तांत्रिक अडचणी दूर होताच व्यवहार नियमित सुरळीत झाले आहेत.
- रणजित कुमार, मुख्य व्यवस्थापक, बॅंक ऑफ महाराष्ट्र, मोरवाडी