Video :...म्हणून 'हा' व्यवसाय सुरू करावा लागला

पिंपरी : लॉकडाउनमुळे अनेकांचा रोजगार बुडाला आहे. परंतु, घरची चूल तर पेटवायची आहे. नुसतं बसून चालणार नसल्याने या संकटात उत्पन्न सुरू राहावे आणि कुटुंबाचा उदरर्निवाह व्हावा, म्हणून अनेकांनी आपला व्यवसाय बदलला आहे. अनेक छोटे हॉटेल, स्नॅक्‍स सेंटर, फुड स्टॉल, झेरॉक्‍स दुकान, ट्रॅव्हल्स, किराणामाल दुकानदारांनी नव्याने भाजीपाला व फळ विक्री सुरू केल्याचे चित्र पहायला मिळत आहे. 

ताज्या बातम्यांसाठी डाऊनलोड करा ई-सकाळचे ऍप

लॉकडाउनमुळे जीवनावश्‍यक वस्तू, किराणा दुकाने वगळता इतर सर्व दुकाने बंद ठेवण्याचे सरकारचे आदेश आहेत. दीड महिन्यापासून बहुतांशी जणांच्या हाताला काम राहिलेले नाही. अनेकांचे छोटे-मोठे व्यवसाय बंद पडले असून, व्यावसायिकांचा व्यवसाय पूर्णपणे बुडाला आहे. कोरोनाचे संकट पुन्हा किती दिवस राहणार, हे अद्याप अस्पष्ट आहे. अनेकांचे सेव्हिंग किंवा मोठे भांडवल संपले आहे. 

पैसे कमवायचे, पोट भरायचे असेल; तर लॉकडाउनमध्ये फक्त भाजी व्यवसाय चांगला चालेल, असे लक्षात आल्यावर अनेकांनी भाजी विक्रीचा व्यवसाय थाटून संसार उभा करण्याचा प्रयत्न केला आहे. 

पिंपरी चिंचवडच्या बातम्या वाचण्यासाठी येथे ► क्लिक करा

भाज्यांबरोबर फळे विक्रीतही बेरोजगारांनी आघाडी घेतली आहे. भाजी विक्रीत फायदा असल्याने बेरोजगार एक ते दीड हजार रुपयांची भाजी खरेदी करून दिवसभर विक्री करतात. एक हजार रुपयांची भाजी विक्रीतून २०० ते ३०० रुपये सुटतात. त्यामुळेच की काय शहरात भाजीविक्री आणि फळे विक्रीची दुकाने वाढल्याचे दिसून येत आहे.

"सध्या भाजी विक्रीला मुभा आहे. या व्यवसायातून घर चालवण्यासाठी ते पुरेसे पैसे मिळू लागले आहेत. घरभाडे, औषधासाठी थोडीफार कमाई होत आहे."

- जगदेवी करचखेड, भाजी व्यावसायिक, अजमेरा कॉलनी, पिंपरी