'ही' परिस्थिती कायम राहिल्यास चिकनचे भाव आणखीन वाढतील

पिंपरी : कोरोनाला सुरुवात झाल्यानंतर चिकन खाण्याकडे खवय्यांनी पाठ फिरवली होती. चिकनला मागणी नसल्यामुळे अनेक पोल्ट्री चालकांनी कोंबड्या खड्ड्यात टाकून नष्ट केल्या होता. त्यामुळे कोंबड्यांचे प्रमाण कमी झाले आहे. आता कोरोनाचा संसर्ग वाढत असताना मांसाहार करणाऱ्यांच्या संख्येत लक्षणीय वाढ झाल्यामुळे एक किलो चिकनसाठी 240 रुपये मोजावे लागत आहेत. सध्या असणारी स्थिती अशीच कायम राहिली, तर या भावातही वाढ होण्याची शक्‍यता वर्तवण्यात येत आहे. 

ताज्या बातम्यांसाठी डाऊनलोड करा ई-सकाळचे ऍप  

...यामुळे वाढलेत भाव

चिकनमधून कोरोनाचा संसर्ग पसरतो, अशी अफवा पसरल्यामुळे अनेक पोल्ट्री चालकांनी आपल्याकडे असणाऱ्या कोंबड्या नष्ट केल्या. त्यामुळे बऱ्याच भागातील पोल्ट्री मोकळ्या झाल्या आहेत. आताच्या परिस्थितीत बुधवार, शुक्रवार आणि रविवार या तीन दिवशी चिकन, मटण आणि मासे यांची विक्री करण्यास परवानगी दिली आहे. मांसाहार करणाऱ्या मंडळीकडून देखील चिकनची मागणी मोठ्या प्रमाणात वाढली आहे. 

पिंपरी चिंचवडच्या बातम्या वाचण्यासाठी येथे ► क्लिक करा

शहरातील एका दुकानात दिवसभरात 80 किलो चिकनची विक्री करण्यात येत आहे. 
कोरोनाचा संसर्ग वाढण्यापूर्वी शहरात मावळ, लोणावळा, चाकण, मुळशी या परिसरात असणाऱ्या पोल्ट्रीमधून चिकन येत होते. आता पुरेशा प्रमाणात कोंबड्याच उपलब्ध नसल्याने दुकानदारांना लांबून माल मागवावा लागत आहे, त्यामध्ये वाहतुकीची समस्या देखील मोठी आहे. त्यामुळे चिकनच्या दरामध्ये वाढ झाली आहे. मटणाचे भावदेखील किलोमागे 100 रुपयांनी वाढले आहेत. या दुकानदारांनाही वाहतूक करण्यात मोठी अडचण येत आहे. त्यामुळे नाइलाजाने भाव वाढवावे लागत असल्याचे मटण विक्रेत्याने सांगितले. 

मासळीचे भाव वाढले, पुरवठा कमी... 

मासळीच्या दरातही 100 ते 200 रुपयांची वाढ झाली आहे. पापलेट, कोळंबी, सुरमई, बोंबिल यांना चांगली मागणी आहे. मात्र, पनवेलमधून त्याचा पुरवठा पुरेशा प्रमाणात होत नसल्यामुळे ग्राहकांची अडचण होत आहे.