...म्हणून हातावर देवेंद्र टॅटू : नरेंद्र पाटील

पिंपरी - ‘देवेंद्र फडणवीस यांचे नेतृत्व उभरते आणि चांगले आहे. भविष्यामध्ये त्यांच्याकडून चांगली कामे होणार आहेत, म्हणून आम्ही त्यांच्यासोबत काम करत आहोत. हा नेता आवडल्यामुळेच मी हातावर ‘देवेंद्र’ असा टॅटू काढला,’’ असे मनोगत महाराष्ट्र राज्य माथाडी, ट्रान्सपोर्ट आणि जनरल कामगार युनियनचे सरचिटणीस, माजी आमदार नरेंद्र पाटील यांनी व्यक्त केले.

औद्योगिक कंपन्या व माथाडी कामगारांचे प्रश्न मांडण्यासाठी पिंपरी येथे बुधवारी आयोजित पत्रकार परिषदेतील एका प्रश्नावर ते बोलत होते. ते म्हणाले, पुणे, पिंपरी-चिंचवड, मुंबई, ठाणे औद्योगिक पट्ट्यासह सातारा औद्योगिक वसाहतीतील बरेच कारखानदार माथाडी कामगार कायद्याचे उल्लंघन करतात. याविषयी वारंवार कामगार आयुक्त, माथाडी बोर्ड आणि पोलिस प्रशासनाकडे तक्रारी केल्या आहेत. तरीही काहीच कारवाई होत नाही. या कायद्याची शंभर टक्के अंमलबजावणी व्हावी.

कायद्यातील तरतूदीनुसार कारखानदारांनी नोंदणी करणे आवश्यक आहे. परंतू वाहतूकदारांच्या नावे नोंदणी केली जाते. यातून कामगारांचे आर्थिक शोषण होते. यासाठी मुळ कारखानदार मालकांची नोंदणी होणे आवश्यक आहे. हे सर्व माथाडी बोर्डच्या अधिकाऱ्यांच्या निदर्शनास आणून दिले तरी कारवाई होत नाही. यासाठी युनियनच्या वतीने पोलिस आयुक्तांकडे तक्रार करणार आहे. यातील बहुतांशी कारखानदार मजूरी बोर्डाकडे सुर्पूद करीत नाहीत. तर त्या ठेकेदाराकडे चुकीच्या माणसाकडे जमा करतात.

यावेळी पुणे जिल्हा परिषदेच्या सदस्या आशा बुचके, युनियनचे संयुक्त सरचिटणीस रविकांत पाटील, विघ्नहर साखर कारखान्याचे संचालक संतोष नाना खैरे, पंचायत समिती सदस्य दिलीप गांजाले, माथाडी युनियन पुणे विभाग सचिव हणमंत तरडे, माथाडी युनियनचे माजी अध्यक्ष पोपटराव धोंडे, कामगार प्रतिनिधी विक्रम मोरे, अशोक साबळे उपस्थित होते.