खालुंब्रे ते चाकण एमआयडीसीपर्यंत होणार एकेरी वाहतूक 

तळेगाव स्टेशन (ता. मावळ)  : तळेगाव-चाकण महामार्ग म्हटले की वाहतूक कोंडी हा शब्द जोडूनच येतो. अरुंद महामार्ग आणि त्यामध्ये चाकण एमआयडीसीचा भाग, अवजड वाहनांची वर्दळ, कामगारांच्या बसची गर्दी या सर्व गोष्टींमुळे खालुंब्रे ते चाकण एमआयडीसीत वाहतूक कोंडी नित्याचीच झाली आहे. येथील कोंडी कमी करण्यासाठी वाहतूक नियंत्रण शाखेने एकेरी वाहतुकीची अंमलबजावणी करण्याचा निर्णय घेतला आहे. त्यातून कोंडी कमी होऊन वाहतूक सुरळीत होण्याच्या वाहतूक पोलिसांना आशा आहे.

- ताज्या बातम्यांसाठी डाऊनलोड करा ई-सकाळचे ऍप 

समस्या काय ?
- खालुंब्रेतील छत्रपती शिवाजी महाराज चौक ते सावरदरी, वासुली आणि भांबोली गावातील कंपन्यांमधील बसची संख्या अधिक 
- बस वाहतुकीमुळे वाहतूक कोंडी 
- खालुंब्रे ते हुंडाई सर्कल या दरम्यानचा रस्ता अरुंद असल्याने कोंडीत भर 
- तळेगाव-चाकण महामार्गाला येऊन मिळणाऱ्या वाहनांमुळे कोंडीचा सामना 

प्रस्तावित उपाययोजना 
- वाहतूक कोंडी सोडविण्यासाठी खालुंब्रे ते हुंडाई सर्कल अशी एकेरी वाहतूक 
- रस्त्यासंदर्भात यापूर्वीचे निर्बंध रद्द करण्यात येत असून प्रायोगिक तत्त्वावर एकेरी वाहतुकीचे आदेश 
- चाकण एमआयडीसीकडे जाण्यासाठी वाहनांना खालुंब्रे ते हुंडाई सर्कल हा एकूण १.४ किलोमीटरचा रस्ता वापरावा 
- एमआयडीसीतून खालुंब्रेकडे येण्यासाठी पर्यायी मार्ग म्हणून हुंडाई सर्कल ते एच पी चौकातून चाकण तळेगाव महामार्गाचा वापर 
- पिंपरी-चिंचवड पोलिस आयुक्तालय वाहतूक शाखेने काढली अधिसूचना 
- नागरिकांनी हरकती व सूचना १० ते २८ मार्चपर्यंत लेखी स्वरूपात असल्यास पिंपरी-चिंचवड यांच्या कार्यालयात कळवाव्यात 

- पुण्याच्या बातम्या वाचण्यासाठी येथे ► क्लिक करा

‘‘एकेरी वाहतूक निर्बंधाबाबतचे फलक बसविण्यासंदर्भात एमआयडीसी प्रशासनास सूचना देण्यात आल्या असून, स्थानिक नागरिक आणि एमआयडीसीतील कामगार, कर्मचारी वर्गाने आदेशाचे पालन करून सहकार्य करावे.’’ 
- सुनील गोडसे, पोलिस निरीक्षक, चाकण वाहतूक नियंत्रण शाखा 

‘‘खालुंब्रेतून एमआयडीसीकडे जाणारा दिड किलोमीटरचा रस्ता खूपच अरुंद आणि खराब आहे. रोजच कोंडी होते. एकेरी वाहतुकीमुळे काहीसा दिलासा मिळू शकेल. जिल्हा परिषदेकडे पाठपुरावा करूनही या रस्याचे रुंदीकरण होत नाही. एमआयडीसी प्रशासनाने हा रस्ता विकसित केल्यास उद्योजक, कामगारांच्या वेळेची बचत आणि दळवळण सुकर होईल. 
- दिलीप बटवाल (सचिव, फाडरेशन ऑफ चाकण इंडस्ट्रीज) 

‘‘चाकण-तळेगाव रस्त्यावरील वाहतूक कोंडीच्या ठिकाणांचे सर्वेक्षण करण्यात आले असून, लवकरच आवश्यक त्या उपाययोजना करणार आहोत.’’ 
- वैशाली भुजबळ, उपअभियंता, सार्वजनिक बांधकाम विभाग 

‘‘एमआयडीसीतील कंपन्या सुटतेवेळी ह्युंडाई कंपनीकडून चाकण रस्त्यावर येणाऱ्या वाहनांमुळे तळेगावकडून चाकणकडे जाणारी रहदारी ठप्प होते. त्यामुळे खालुंब्रेत नेहमी वाहतुक कोंडीत होते. याचा त्रास स्थानिकांनाच जास्त होतो.एकेरी वाहतुकीमुळे कोंडी निश्चितच कमी होण्यास मदत होईल. सार्वजनिक बांधकाम विभागाने किमान चौकातील अतिक्रमणे काढून रस्ता मोकळा करावा.’’ 
- अविनाश बोत्रे, स्थानिक रहिवासी, खालुंब्रे