Dehu News : दोन दशकांनी चिंचोलीत ज्येष्ठ मित्रांची हृद्य भेट; ब्रिटिशकाळापासूनच्या आठवणींना उजाळा

देहू - चिंचोली येथे वयाची शंभरी पार केलेल्या दोन मित्रांची तब्बल २० वर्षांनंतर हृद्य भेट झाली. एकमेकांना भेटून त्यांना खूप आनंद झाला. ब्रिटिशकाळापासून आजपर्यंतच्या आठवणींना उजाळा मिळाला.

चिंचोली येथील मारुती पानसरे (वय १०२) आणि महाळुंगे (ता. खेड) येथील पंढरीनाथ इंगवले (वय १०३) अशी त्या मित्रांची नावे आहेत. देहूजवळील चिंचोली हे गाव लष्कराच्या विविध डेपोंनी वेढलेले आहे. ब्रिटिश काळामध्ये देहूरोड परिसरात सीओडी डेपोची स्थापना झाली. त्यावेळी अनेक शेतकऱ्यांच्या जमिनी लष्कराने संपादित केल्या.

स्थानिक शेतकऱ्यांना व त्यांच्या मुलांना डेपोमध्ये नोकरी दिली. याच काळात मारुती पानसरे आणि पंढरीनाथ इंगवले सीओडी डेपोमध्ये कामगार म्हणून भरती झाले. इंगवले आणि पानसरे हे दोघेही शेतकरी कुटुंबातील.

पैलवानकी, मेहनत आणि कष्ट करून आज वयाची शतक पार करूनही इंगवले हे सुस्थितीत आहे; तर पानसरे हे वयोमानानुसार थकले आहेत. आपले मित्र पानसरे खूप आजारी असल्याचे इंगवले यांना समजले. त्यामुळे त्यांनी मुलगा बाळासाहेब याला ‘तू मला पानसरे यांना भेटण्यासाठी घेऊन चल.’ असा आग्रह धरला.

मात्र लवकर नेले नाही, त्यामुळे इंगवले नाराज झाले. त्यांनी घरामध्ये जोपर्यंत मित्राची भेट घडवून आणत नाही; तोपर्यंत जेवणार नाही, असा हट्ट धरला. त्यामुळे अखेर बाळासाहेब इंगवले यांनी वडिलांना सोबत घेऊन मारुती पानसरे यांची भेट घडवली. दोघे मित्र ज्यावेळेस एकमेकांना भेटले त्यावेळेस त्यांना खूप आनंद झाला.

याबाबत बाळासाहेब इंगवले म्हणाले, ‘ब्रिटिश काळामध्ये स्थापन झालेल्या डेपोमध्ये दोघेही कामगार म्हणून कामास होते. त्याकाळी डेपोमध्ये बॉम्ब बनवण्याचे काम सुरू होते. हे बॉम्ब कधीही फुटत असायचे. एकदा असाच डेपोमध्ये बॉम्ब फुटला. कामगार सैरावैरा पळाले.

माझे वडील आणि पानसरे काका यांची भेट मामुर्डी येथे याच वेळेस झाली. वडिलांनी मला हा किस्सा सांगितला. तसेच पायाची शीर तुटली, हेही सांगितले. या आठवणी ऐकून मी व पानसरे काका यांच्या घरातील व्यक्तीही आश्चर्यचकित झाल्या.’