मिळकतकर भरा, अन्यथा कारवाई; पिंपरी-चिंचवड महापालिका आयुक्तांचा इशारा 

पिंपरी : शहरातील सर्व मिळकतधारकांनी अभय योजनेसह मिळकतकर भरण्यासाठीच्या विविध सवलत योजनांचा लाभ घ्यावा. आपल्या थकीत मिळकतकराचा भरणा ३१ मार्च पूर्वी करावा, अन्यथा कठोर कारवाईस सामोरे जावे लागेल, असा इशारा महापालिका आयुक्त राजेश पाटील यांनी दिला आहे. करसंकलन विभागामार्फत चालू वर्षात मिळकत करापोटी ४९५ कोटी रुपये वसूल झाले आहेत. अंदाजपत्रकीय उद्दिष्टापेक्षा ३७५ कोटी रुपयांनी मिळकत कर वसूल कमी असल्याने महापालिकेमार्फत मोठ्या थकबाकीदारांच्या मिळकती जप्त करणे अथवा जप्ती अनुषंगिक कठोर कारवाई सुरू आहे. अशी कारवाई मार्च महिन्यानंतरही सातत्याने सुरू राहणार आहे.

आजअखेर सवलत योजनेअंतर्गत सात हजार ४०१ मिळकतधारकांनी लाभ घेतला असून ८८ कोटी ४९ लाख रुपये मिळकतकराचा भरणा केला आहे. या सवलती लागू असूनही, ज्या मिळकतधारकांनी अद्यापही मिळकतकराचा भरणा केला नाही व ज्यांची थकबाकी २५ लाखांपेक्षा जास्त आहे, अशा थकबाकीदारांची यादी महापालिकेच्या www.pcmcindia.gov.in या संकेतस्थळावर प्रसिद्ध केली आहे. त्यांची नावे क्षेत्रिय कार्यालय व विभागीय कार्यालयांच्या दर्शनी भागात प्रसिद्ध करण्यात येणार आहेत. 

ताज्या बातम्यांसाठी डाऊनलोड करा ई-सकाळचे ऍप

अशा आहेत सवलत योजना 

सरकारने एक वेळची विशेष बाब म्हणून अवैध बांधकाम शास्ती वगळून मूळ कर भरणा करण्यासाठी ३१ मार्च २०२१ पर्यंतच सवलत दिलेली आहे. त्यानंतर कठोर कारवाईद्वारे थकबाकी वसूल करण्याचा आदेश दिलेला आहे. जास्तीत जास्त नागरिकांनी मिळकतकराचा भरणा करण्यासाठी ३१ मार्च अखेर थकबाकीसह संपूर्ण कराचा भरणा करणाऱ्या मिळकतधारकांना महापालिका शास्ती करामध्ये (विलंब शुल्क) ७५ टक्के सवलत देण्यात येत आहे. 

पिंपरी-चिंचवडच्या बातम्या वाचण्यासाठी येथे ► क्लिक करा

ऑनलाइन भरणा सुविधा 

नागरिकांच्या सोयीच्या दृष्टीने सर्व करसंकलन विभागीय कार्यालयात साप्ताहिक व सार्वजनिक सुटीच्या दिवशी मिळकतकराची रक्कम रोख किंवा धनादेश किंवा डिमांड ड्रॉप्टद्वारे भरणा करता येईल. महापालिकेच्या www.pcmcindia.gov.in या संकेतस्थळावर मिळकतकर भरण्यासाठी ऑनलाइन सुविधा उपलब्ध आहे.