पिंपरी : खड्ड्याला जबाबदार असणाऱ्या ठेकेदार, अधिकाऱ्यांवर कारवाई करा

पिंपरी - शहरातील रस्त्याच्या खड्ड्याला जबाबदार असणाऱ्या ठेकेदार, अधिकारी, सल्लागार व गुणवत्ता नियंत्रण तपासणारी संस्था याची चौकशी करून दोषींवर कारवाई व्हावी, अशी मागणी सामाजिक कार्यकर्ते मारुती भापकर यांनी महापालिका आयुक्त राजेश पाटील यांच्याकडे केली आहे.

शहरात मागील आठ-दहा दिवसांपासून पाऊस होता. या पावसात नव्याने बनवण्यात आलेले डांबरी रस्ते वाहून जाणे या रस्त्यांवर खड्डे पडणे, असे प्रकार समोर आले आहेत. खरे तर हा आपल्या प्रशासनाच्या निकृष्ट व भ्रष्ट कारभाराचा पुरावाच शहरवासीयांच्या समोर आला आहे. त्यामुळे ज्या रस्त्यांवर हे खड्डे पडले आहेत, ते रस्ते बनवणारे ठेकेदार, अधिकारी, सल्लागार व गुणवत्ता नियंत्रण संस्था यांच्या संगणमताच्या भ्रष्टाचारामुळेच शहरवासीयांच्या जीविताला हा धोका निर्माण झाला आहे. त्यामुळे शहरातील ज्या रस्त्यांवर खड्डे पडलेत त्या रस्त्यांच्या कामाची आपण चौकशी करून संबंधित दोषींवर कठोर कारवाई करावी. झालेला खर्च ठेकेदार, अधिकारी, सल्लागार व गुणवत्ता नियंत्रण संस्था यांच्याकडून वसूल करावा, असे भापकर यांनी निवेदनात म्हटले आहे.

शहरातील ८० टक्के खड्डे भरल्याचा दावा

शहरातील आठ ही क्षेत्रीय कार्यालयाच्या हद्दीतील २३८ खड्डे डांबरणाने भरण्यात आले. बीबीएमने ५३ खड्डे भरण्यात आले. डब्लूएमएमने ३९७ खड्डे भरण्यात आले. पेव्हिंग ब्लॉगने ३२ खड्डे भरण्यात आले, मुरूम; खडीने १२६ खड्डे भरण्यात आले, असे एकूण ८४६ खड्डे भरण्यात आले. शहरातील ८० टक्के खड्डे भरण्यात आले असून, उर्वरित २० टक्के खड्डे भरण्याचे काम सुरू आहे, असा दावा शहर अभियंता मकरंद निकम यांनी नुकताच केला आहे, असे भापकर यांनी निवेदनात म्हटले आहे.