PCMC News : वायसीएम : दोन एक्सरे मशिन बंद; तपासण्यांसाठी रुग्णांची खासगी रुग्णालयांकडे धाव

पिंपरी - यशवंतराव चव्हाण स्मृती रुग्णालयातील (वायसीएम) एक्सरे मशिन गेल्या दीड ते दोन महिन्यांपासून बंद आहेत. एकूण तीन मशीनपैकी दोन मशिन बंद असून, उर्वरित एक मशिनदेखील बंद पडण्याच्या मार्गावर आहेत. सोनोग्राफी मशिनची देखील याच प्रकारे दुरवस्था झाली असल्याने रुग्णांच्या लांबच-लांब रांगा तपासणीसाठी लागत आहेत. परिणामी, रुग्णांना खासगी रुग्णालयात धाव घेण्याची वेळ आली आहे.

‘वायसीएम’ रुग्णालयात दररोज येणाऱ्या रुग्णांची संख्या दोन हजारांच्या घरात आहे. त्यापैकी, दाखल होणाऱ्या रुग्णांची संख्यादेखील अधिक आहे. कोणत्याही आजारांची तपासणी करण्यासाठी एक्सरे व गर्भवतींसाठी सोनोग्राफी अत्यावश्यक आहे. डॉप्लर आणि सोनोग्राफीच्या इतर तपासणीसाठी तब्बल एक महिन्यांचे वेटिंग आहे. सध्या एक्सरे काढण्यासाठी रुग्णांना दिवसभर ताटकळत रुग्णालयात बसण्याची वेळ आली आहे. अतिग्रस्त आजार असलेले रुग्ण सध्या खासगी रुग्णालयात धाव घेत आहेत. एक्सरे काढल्यानंतर अनेकांना एक्सरेची फिल्म देखील मिळत नाही. शिवाय, या विभागातील कर्मचारीदेखील मशिन बंद असल्याने दिवसभर बसून असल्याचे चित्र आहे.

दिवसाकाठी सध्या ३०० ते ४०० रुग्णसंख्या केवळ एक्सरेसाठी दाखल होत आहेत. तर, सोनोग्राफीसाठी २०० ते ३०० दैनंदिन रुग्णसंख्या आहे. ट्रॉमा, फ्रॅक्चर, न्यूमोनिया, पोटाचे विकार, किडनी स्टोन, आतड्यांचे आजार, फुप्फुसाचे विकार आदी आजारांसाठी तातडीने एक्सरेची गरज भासत आहे. तर, किडनी स्टोन, लिव्हर, आतडे, ॲपेडिंक्स, लघवीचे विकार, कॅन्सर, गर्भाशय पिशवी, पिताशयाचे खडे आदी आजारांसाठी तत्काळ सोनोग्राफी लागत आहे. मात्र, नादुरुस्त मशिनमुळे रुग्णांना अनेक अडचणींचा सामना करावा लागत आहे. जादा शुल्क मोजत खासगी रुग्णालयात धाव घेण्याची वेळ रुग्णांवर आली आहे.

याबाबतची माहिती घेतो. ‘वायसीएम’चे डीन यांच्याशी संवाद साधतो.

- जितेंद्र वाघ, अतिरिक्त आयुक्त, महापालिका