पिंपरी: पुन्हा मुळशी पॅटर्न - मोहोळ - शेलार टोळीयुद्धाचा भडका

पिंपरी: कुख्यात गुंड शरद मोहोळ व विठ्ठल शेलार यांच्यातील टोळीयुद्धाचा भडका उडाला. व्यावसायिक वादातून म्हाळूंगे येथील एकाला पिस्तुलाचा धाक दाखवून धमकी दिल्याच्या कारणावरुन मोहोळ टोळीने एक महिन्यापूर्वी म्हाळुंगे येथे वाहनावंर दगडक केली. वाहनांवर कुंड्या फेकून काचा फोडत दहशत निर्माण केली. याप्रकरणी हिंजवडी पोलिस ठाण्यात शरद मोहोळ याच्यासह दहा जणांवर महिनाभराने गुन्हा दाखल झाला. दरम्यान, या घटनांवरून पुन्हा मुळशी पॅटर्न घडण्याची भिती व्यक्त केली जात आहे.

कुख्यात गुंड शरद हिरामण मोहोळ (रा. माऊलीनगर, सतारदरा, कोथरुड), आलोक शिवाजी भालेराव (रा. वडाची वाडी, पौड रोड, कोथरुड), मल्हारी मसुगडे (रा. ताजणे वस्ती कॉर्नर, माळवाडी, पुनावळे), सिद्धेश बाहु हगवणे (वय ३०, रा. म्हाळुंगे) व त्याच्या इतर ५ ते ६ साथीदारांवर गुन्हा दाखल झाला आहे. ही घटना ८ जानेवारीला मध्यरात्री सव्वाबारा ते एकच्या दरम्यान घडली. गुंड विठ्ठल शेलार याने व्यावसायिक वादातून हगवणे याला पिस्तुलाचा धाक दाखवून धमकी दिली होती. त्यामुळे शरद मोहोळ याच्या सांगण्यावरुन सिद्धेश हगवणे, मल्हारी मसुगडे, आलोक भालेराव व त्यांच्या साथीदारांनी विठ्ठल शेलार व त्याचे साथीदार राधा चौकात असल्याचे समजून तेथे आले.

त्यावेळी तेथून जाणाऱ्या एका गाडीत विठ्ठल शेलार असल्याचे समजून गाडीतून पळून जाणाऱ्या साथीदारांवर त्यांनी दगड व कुंड्या फेकून मारुन गंभीर हल्ला केला. तसेच राधा हॉटेल व तेथून येणाऱ्या जाणाऱ्या लोकांच्या जिवाची पर्वा न करता रोडवर दगडफेक केली. वाहनांच्या काचा फोडत परिसरात दहशत निर्माण केली.

याप्रकरणी पोलिसांनी तातडीने गुन्हा दाखल करणे आवश्यक असताना तब्ब्ल महिनाभरानंतर गुन्हा दाखल झाला आहे. हिंजवडी पोलिस अधिक तपास करीत आहेत.

पुन्हा मुळशी पॅटर्न

यापूर्वी मुळशी तालुक्यात जमिनीच्या वादातून टोळीयुद्ध भडकले. यामध्ये काही जणांचा अंतही झाला. यावर आधारित मुळशी पॅटर्न चित्रपटही प्रदर्शित झाला. दरम्यान, टोळ्यांमधील वाद काहीसे थंडावले होते. मात्र, म्हाळुंगे येथील घटनेवरून पुन्हा टोळीयुद्ध भडकण्याची भीती व्यक्त होत आहे.