चिंचवडमधील रस्त्यांवरून शिवसेना अन् भाजपमध्ये राजकारण पेटलंय

पिंपरी : चिंचवड विधानसभा मतदारसंघातील रस्त्यांच्या प्रश्‍नावरून सत्ताधारी भारतीय जनता पक्ष आणि विरोधी राष्ट्रवादी कॉंग्रेस, शिवसेना यांच्यात कुरघोडीचे राजकारण सुरू आहे. त्याची प्रचिती महापालिका स्थायी समिती सभेतही आली. गेल्या दोन सभांमध्ये वाकड-ताथवडेतील रस्त्यांचे विषय गाजले. चारपैकी दोन रस्त्यांचे प्रस्ताव भाजपने फेटाळले. त्यावर राष्ट्रवादी व शिवसेनेने आताच्या सभेत कुरघोडी केली. भाजपचे माजी शहराध्यक्ष आमदार लक्ष्मण जगताप यांच्या गावातील रस्त्याच्या विषयावर मतदान घ्यायला लावून प्रस्तावाच्या बाजूने मतदान केले आणि 'विकासा'ची 'चाल' चालल्याचे सांगितले. 

ताज्या बातम्यांसाठी डाऊनलोड करा ई-सकाळचे ऍप 

पिंपरी-चिंचवडच्या बातम्या वाचण्यासाठी येथे ► क्लिक करा

आमदार जगताप आणि ताथवडे- वाकड प्रभागाचे नेतृत्व करणारे शिवसेनेचे नगरसेवक राहुल कलाटे यांच्यातील राजकीय वैर सर्वश्रूत आहे. गेल्या विधानसभा निवडणुकीत दोघेही एकमेकांच्या विरोधात लढले. कलाटे यांना राष्ट्रवादीने पुरस्कृत केले होते. त्यांच्या प्रभागातील चार नवीन रस्त्यांचा प्रस्ताव गेल्या महिन्यातील स्थायी समिती सभेत होता. त्यातील दोन प्रस्ताव मतदानाद्वारे मंजूर झाले होते. भाजपचे शहराध्यक्ष आमदार महेश लांडगे समर्थक सदस्यांनी शिवसेना, राष्ट्रवादीची बाजू घेतली होती. तर, जगताप समर्थकांनी विरोधात मतदान केले होते. त्या वेळी तहकूब केलेले दोन प्रस्ताव नंतरच्या सभेत जगताप व लांडगे समर्थकांनी एकमताने फेटाळून लावले. आता जगताप यांच्या पिंपळे गुरवमधील रस्ता सिमेंटचा करण्याचा प्रस्ताव होता. त्यावर राष्ट्रवादी व शिवसेनेने मतदान घ्यायला लावले. पण, प्रस्तावाच्या बाजूने मतदान करून विषय मंजूर केला. 

स्थायी समिती कोरम 

• एकूण सदस्य : 16 
• उपस्थित : 10 
• भाजप : 6 
• राष्ट्रवादी : 3 
• शिवसेना : 1 

आम्ही भाजपच्या बाजूने नव्हे, तर विकासाच्या बाजूने मतदान केले आहे. 
- राहुल कलाटे, गटनेता, शिवसेना