Pimpri-Chinchwad : शक्ती प्रदर्शन करत भाजपच्या उमेदवार अश्विनी जगताप यांचा उमेदवारी अर्ज दाखल

पिंपरी- चिंचवड विधानसभा मतदारसंघाच्या पोटनिवडणुकीसाठी भाजप, बाळासाहेबांची शिवसेना, आरपीआय, राष्ट्रीय समाज पक्ष व शिवसंग्राम युतीच्या उमेदवार अश्विनी लक्ष्मण जगताप यांनी जोरदार शक्तिप्रदर्शन करत आज सोमवारी (ता. ६) उमेदवारी अर्ज दाखल केला.

तत्पूर्वी जगताप यांनी पिंपळेगुरव ते थेरगाव येथील “ग” क्षेत्रीय कार्यालय, निवडणूक निर्णय अधिकारी कार्यालयापर्यंत पदयात्रा काढली. या पदयात्रेत भाजप कार्यकर्त्यांची मोठी गर्दी होती.

“ग” क्षेत्रीय कार्यालयात जगताप यांचा अर्ज निवडणूक निर्णय अधिकारी सचिन ढोले यांच्याकडे सादर केला. यावेळी प्रदेशाध्यक्ष चंद्रशेखर बावनकुळे, पालकमंत्री चंद्रकांत पाटील, आरोग्य मंत्री तानाजी सावंत, खासदार श्रीरंग बारणे, भाजप शहराध्यक्ष व आमदार महेश लांडगे, चिंचवड विधानसभा निवडणूक प्रमुख शंकर जगताप आदी उपस्थित होते.

रॅलीमध्ये भाजपसह मित्र पक्षाचे स्थानिक पदाधिकारी, कार्यकर्ते मोठ्या संख्येने उपस्थित होते.भाजपचे दिवंगत आमदार लक्ष्मण जगताप यांच्या पिंपळेगुरव येथील जनसंपर्क कार्यालयापासून पदयात्रेला सुरूवात झाली. गावातील भैरवनाथ मंदिरात दर्शन घेतल्यानंतर

सृष्टी चौक, सुदर्शननगर, जवळकरनगर, कल्पतरू फेज १, सुदर्शन चौक, स्वराज गार्डनमार्गे पिंपळेसौदागर गावठाण पुढे शंकर मंदिर, रहाटणी चौक, विमल गार्डन, बळीराज गार्डन, कुणाल गार्डन, बापुजी बुवा मंदिर, थेरगाव हॉस्पिटलमार्गे “ग” क्षेत्रीय कार्यालयापर्यंत ही पदयात्रा काढण्यात आली.