Metro : माण-हिंजवडी-शिवाजीनगर नावे धावणार मेट्रो; ग्रामस्थांकडून समाधान व्यक्त

हिंजवडी - राजीव गांधी इन्फोटेक पार्क हिंजवडीत वसल्याचा किंबहुना आयटी पार्क हिंजवडी असे नाव सर्वत्र प्रसिद्ध. मात्र, देशहितासाठी हजारो एकर जमीन देऊन भूमिहीन झालेल्या माण भूमिपुत्रांना उशिरा का होईना न्याय आणि बहुमान मिळाला आहे. बहुचर्चित हिंजवडी मेट्रो प्रकल्प आता नव्याने माण-हिंजवडी-शिवाजीनगर मेट्रो प्रकल्प झाल्याने या नावेच आता मेट्रो धावणार आहे. त्यामुळे माण ग्रामस्थांनी आनंद विशेष व्यक्त केला.

आयटीतील महत्त्वाच्या प्रकल्पांना ‘माण’ गावाचे नाव असावे यासाठी ग्रामस्थांनी सरकार दरबारी वारंवार पाठपुरावा केला होता. मेट्रो प्रकल्प जाहीर झाल्यानंतरही काही ग्रामस्थांनी त्यास विरोध करीत माणच्या नावाचा समावेश करून नामकरण करण्याची मागणी केली होती. वारंवार पत्रव्यवहार करत अधिकाऱ्यांच्या भेटीगाठी सुरू होत्या.

त्यामुळे माण ग्रामपंचायत व ग्रामस्थांच्या लढ्यास यश आले असून, आता माणमध्ये सुरू असलेल्या केंद्र सरकारच्या महत्वकांक्षी पुणे मेट्रो ३ प्रकल्पाला ‘माण-हिंजवडी-शिवाजीनगर मेट्रो प्रकल्प’ असे नाव देण्यास केंद्र सरकारच्या गृहनिर्माण आणि शहरी व्यवहार मंत्रालयाने मंजुरी दिली आहे. याबाबतचे मान्यताप्राप्त राजपत्र नुकतेच प्रसारित करण्यात आले आहे. आयटीचे अनेक टप्पे माण गावात आहेत.

यासाठी हजारो एकर जमिनीवर शिक्के पडले आहेत. यापूर्वी देखील हजारो एकर जमिनींवर आयटी हब विस्तारले आहे. त्यामुळे हिंजवडीसोबतच माण गावाचे नाव एमआयडीसी व सर्व शासकीय यंत्रणेच्या अधिकार कक्षेत यावे यासाठी गेल्या अनेक वर्षांपासून माण ग्रामपंचायत व ग्रामस्थ शासनदरबारी पाठपुरावा करत आहेत. अखेर या लढ्याला यश आले.

ग्रामपंचायत सदस्यांनी केलेला पाठपुरावा व ग्रामस्थांच्या एकजुटीची दखल सरकारने घेतली ग्रामस्थांनी ग्रामसभेत उपस्थित केलेल्या प्रश्नावर अस्मितेची लढाई म्हणून आमच्या सर्व सदस्यांनी लोकप्रतिनिधी व प्रशासनाकडे पाठपुरावा केल्याने नामतरांचा हा प्रश्न मार्गी लागला. हे माणवासीयांच्या लढ्याचे यश आहे.’

- अर्चना आढाव, सरपंच माण