पिंपरी-चिंचवडकरांनो आरटीओ विभाग आजपासून सुरू झालाय

पिंपरी : कोरोनाचा वाढत्या प्रादुर्भावामुळे गेल्या तीन महिन्यांपासून सरकारी कार्यालयातील कामकाज ठप्प होते. मात्र, आता 'अनलॉक' केल्यामुळे प्रादेशिक परिवहन कार्यालयातील नियमित कामकाज आजपासून (ता.22) पूर्ववत झाले आहे. मात्र, पक्के आणि शिकाऊ परवान्याप्रमाणे आता कार्यालयामध्ये प्रत्येक कामासाठी अपॉईंटमेंट घ्यावी लागणार आहे. कार्यालयातील गर्दी कमी करण्यासाठी हा निर्णय घेण्यात आला आहे. 

ताज्या बातम्यांसाठी डाऊनलोड करा ई-सकाळचे ऍप   

कोरोनाचा प्रादुर्भाव रोखण्यासाठी शासनाने मागील काही दिवसांपासून शिकाऊ आणि पक्के लायसन्स देण्याचे कामकाज बंद ठेवले होते. काही दिवसांच्या विश्रांतीनंतर वाहन नोंदणी, वाहन हस्तांतरण, वाहन विषयक सर्व कामे, परवाना विषयक सर्व कामे, वायुवेग पथक यांचे काम पुन्हा सुरू झाले आहे. मात्र, कोरोनाचा प्रादुर्भावाच्या पार्श्‍वभूमीवर गर्दी टाळण्यासाठी मोशी आरटीओ कार्यालयाने सर्वच कामांसाठी अपॉईंटमेंट घेणे बंधनकारक केले आहे. वेळ घेतल्याशिवाय कोणतेही काम होणार नाही. लायसन्स आणि वाहन विषयक कामांसाठी सकाळी आठ वाजता आगाऊ वेळ घ्यावी. त्यासाठी निर्धारण प्रणाली (अपॉईंटमेंट) सुरू केली आहे. आरटीओ कार्यालयातील उपलब्ध कर्मचारी आणि अधिकारी यांच्या संख्येनुसार कामकाज सुरू करण्यात आले आहे. 

पिंपरी चिंचवडच्या बातम्या वाचण्यासाठी येथे ► क्लिक करा

अशी घेणार काळजी 

लर्निंग लायसन्सची संगणक चाचणी घेताना दोन अर्जदारांमध्ये किमान सहा फूट अंतर राखले जाणार आहे. एका अर्जदाराची चाचणी झाल्यास संगणक, की बोर्ड सॅनिटाईज करणार, तसेच अर्जदारांनी आरटीओ कार्यालयात येताना मास्क, हॅन्डग्लोज घालून प्रवेश करावा, असे आवाहन प्रादेशिक परिवहन अधिकारी विनोद सगरे यांनी केले आहे. लॉकडाउनच्या कालावधीमध्ये वैधता संपलेल्या लर्निंग लायसन्सची वैधता 30 सप्टेंबर 2020 पर्यंत वाढविली आहे. त्यामुळे लर्निंग लायसन्स धारकांनी आपल्या वेळेत पक्के लायसन्स चाचणी देऊन घ्यावे. मोटार ड्रायविंग स्कूलच्या वाहनावर चाचणी घेतल्यास एका उमेदवाराची चाचणी झाल्यानंतर वाहन सॅनिटाईज केले जाईल. त्यानंतर दुसऱ्या उमेदवाराची चाचणी घेतली जाईल.

पुण्याच्या बातम्या वाचण्यासाठी येथे ► क्लिक करा