'आमचा पगार कापला जातोय'

पिंपरी : उद्योजकांना जुलैपर्यंत कामगारांना वेतन देण्याबाबत केंद्र सरकारने सक्ती करु नये, या सर्वोच्च न्यायालयाने दिलेल्या आदेशाचा काही कंपन्या गैरवापर करीत असून कामगारांना अगोदर दिलेला पगार टप्प्याटप्प्याने कापून घेत असल्याचा आरोप कामगार संघटनांनी केला आहे. तशा आशयाच्या तक्रारी 55 कामगार संघटनांनी पुण्यातील कामगार उपायुक्त कार्यालयाकडे केल्या आहेत. 

ताज्या बातम्यांसाठी डाऊनलोड करा ई-सकाळचे ऍप 

लॉकडाऊनमुळे अनेक कंपन्या बंद होत्या. त्यामुळे कामगारांच्या हाताला काम नव्हते तर उद्योजकांच्याही मालाची विक्री होत नसल्याने अनेकांकडे पैसे नव्हते. मात्र केंद्र सरकारने उद्योजकांना कामगारांचे संपूर्ण वेतन देण्याचा आदेश दिला होता. यासंदर्भात सर्वोच्च न्यायालयाने दिलेल्या आदेशात जुलैपर्यंत उद्योजकांना सरकारने यासंदर्भात सक्ती करु नये, असा आदेश दिला. 

पुण्याच्या बातम्या वाचण्यासाठी येथे  क्लिक करा

सर्वोच्च न्यायालयाने दिलेल्या निर्णयाचा काही कंपन्या गैरअर्थ काढत आहेत, असा कामगार संघटनांचा आरोप आहे. काही कंपन्यांनी गेल्या तीन महिन्यात कामगारांना दिलेल्या वेतनाच्या दर महिना 25 ते 50 टक्के या प्रमाणे जून महिन्याच्या पगारापासून कपात करण्यास सुरवात केली आहे. यासंदर्भात कामगारांनी ते सभासद असलेल्या कामगार संघटनांकडे तक्रारी केल्या आहेत. या तक्रारींची दखल घेत सुमारे 55 कामगार संघटनांनी यासंदर्भात कामगार उपायुक्त कार्यालयाकडे तक्रारी केल्या आहेत. न्यायालयाच्या आदेशाचा काही उद्योजक गैरअर्थ काढत असल्याचा या संघटनांचा आरोप आहे. 

पुण्याच्या बातम्या वाचण्यासाठी येथे  क्लिक करा

यासंदर्भात राष्ट्रीय श्रमिक एकता महासंघाचे अध्यक्ष किशोर ढोकले यांनी सांगितले, ""वेतनातून कपात होत असल्याच्या अनेक कामगारांनी तक्रारी केल्या आहेत. काही उद्योजक न्यायालयाच्या आदेशाचा गैरअर्थ काढत आहेत. अशा प्रकारे दिलेल्या वेतनातून पुन्हा कपात करणे कायद्याला धरुन नाही. यासंदर्भात 55 कामगार संघटनांनी कामगार उपायुक्त कार्यालयाकडे तक्रारी केल्या आहेत. काही कंपन्यांनी तर केलेल्या कामाचाही पगार कामगारांना दिलेला नसून अशा सुमारे 40 कंपन्यांना अगोदरच महासंघाच्या वतीने पत्रे पाठविण्यात आली आहेत. ''