आता धीर सुटला; पुणे, पिंपरीतील सलून व्यावसायिकांनी घेतलाय हा मोठा निर्णय!

भोसरी : राज्य शासनाने १५ जूनपर्यंत सलून सुरू करण्याची परवानगी दिली नाही. तर महाराष्ट्र नाभिक महामंडळ पिंपरी-चिंचवड कृती समिती, महाराष्ट्र नाभिक महामंडळ पुणे शहर, आणि ब्युटी थेरपी अॅन्ड कॅास्मोलॅाजी आदींसह इतर नाभिक संघटनाद्वारे राज्य शासनाविरुद्ध आमरण उपोषण करण्याचा इशारा दिला. याबाबत पिंपरीतील संत तुकारामनगरमध्ये शनिवारी (ता. १३)  पत्रकार परिषद झाली.

ताज्या बातम्यांसाठी डाऊनलोड करा ई-सकाळचे ऍप     

या वेळी कृती समितीचे अध्यक्ष गणेश वाळुंजकर, सरचिटणीस पुंडलिक सैदाणे, महामंडळाचे अध्यक्ष महेश सांगळे, कॅास्मेटोलॅाजीच्या अंजली जोशी, सलमानी समाजाचे प्रदेशाध्यक्ष नशीम शेख, सचिव शकील शेख, सागर आढाव, मदन तांदळे, रविंद्र फुलपगारे, समाधान गवळी आदींसह पदाधिकारी आणि सलून व्यावसायिक उपस्थित होते. लॅाकडाउन शिथील झाल्यावर सलून व्यतिरिक्त इतर दुकाने सुरू करण्याची परवानगी राज्य शासनाने दिली. 

पिंपरी चिंचवडच्या बातम्या वाचण्यासाठी येथे ► क्लिक करा

सलूनची दुकाने बंद असल्याने सलून व्यावसायिक आर्थिक अडचणीत आले आहे. आर्थिक अडचणीत अडकलेल्या काही सलून व्यावसायिकांद्वारे आत्महत्या करण्याचा प्रयत्न होत आहे. सलूनची दुकाने सुरू करण्याची विनंती अनेकवेळा राज्य शासनाला करूनही राज्य शासन या विनंतीला केराची टोपली दाखवत असल्याचा आरोप सलून व्यावसायिकांनी या पत्रकार परिषदेत केला. त्याचप्रमाणे १५ जूनपर्यंत राज्य शासनाने सलूनची दुकाने सुरू करण्यासाठीची परवानगी न दिल्यास राज्य शासनाविरुद्ध आमरण उपोषण करण्याचा इशारा विविध नाभिक संघटनांच्या पदाधिकाऱ्यांनी या वेळी दिला. 

पुण्याच्या बातम्या वाचण्यासाठी येथे ► क्लिक करा