प्राधिकरणात रविवारी उलगडणार वाइल्ड लाइफ दुनियेतील भावविश्व

पिंपरी, ता. ६ ः वाघ, सिंह, हत्तीपासून जगभरातील विविध वाइल्ड लाइफ सेंचुरी व जंगलातील थरारक प्रसंग, प्राणी-पक्षी यांच्या विविध हालचाली प्रसिद्ध छायाचित्रकार बैजू पाटील यांनी टिपलेल्या आहेत. त्यांचा अप्रतिम फोटोग्राफीचा स्लाइड शो व त्यांची प्रकट मुलाखत जागतिक पर्यावरण दिनानिमित्त रविवारी (ता.९) सकाळी साडेनऊ वाजता आकुर्डी-प्राधिकरणातील ग. दि. माडगूळकर नाट्यगृहात होणार आहे. देवदत्त फोटोग्राफी स्कूलतर्फे आयोजित कार्यक्रमास महामेट्रोचे महाव्यवस्थापक श्रावण हर्डीकर, निवृत्त सनदी अधिकारी दिलीप बंड, इनोव्हेटिव्ह वर्ल्ड स्कूलचे संचालक डॉ. संजय सिंग आदी उपस्थित राहतील. वाइल्ड लाइफ फोटोग्राफी बद्दल अनेक समज, गैरसमज, त्यातील आव्हाने, कोणते कॅमेरे वापरावेत, कोणत्या लेन्स वापराव्यात, कोणत्या वेळी कुठे व कशी वाइल्ड लाइफ फोटोग्राफी करावी, अशा अनेक प्रश्नांची उत्तर या कार्यक्रमातून मिळणार आहेत. बैजू पाटील यांची मुलाखत प्रसिद्ध छायाचित्रकार देवदत्त कशाळीकर घेणार आहेत.