खिडकीचे गज कापून शिरायचे घरात, घरफोडी करणाऱ्या टोळीचा पोलिसांनी केला पर्दाफाश

पिंपरी  : बंद घरांच्या खिडकीचे गज कापून घरफोडी करणाऱ्या टोळीचा पर्दाफाश करण्यात गुन्हे शाखा युनिट पाचच्या पथकाला यश आले आहे. एका आरोपीला अटक करून त्याच्याकडून १२ लाख ७८ हजार ४५० रुपये किमतीचे दागिने पोलिसांनी जप्त केले आहेत. अशी माहिती पोलिस आयुक्त कृष्ण प्रकाश यांनी दिली.

लिंग्या उर्फ अजित व्यंकप्पा पवार (वय ३०, रा. जेऊर, ता. अक्कलकोट, जि. सोलापूर), असे अटक केलेल्या आरोपीचे नाव आहे.  घरफोडी करणाऱ्या आरोपीबाबत पथकाला माहिती मिळाली होती. त्यानुसार  पथकाने औरंगाबाद येथे जाऊन वाळूज परिसरातून वाळूज पोलिसांच्या मदतीने सापळा रचला. तेथे चार दिवस वेशांतर करून आरोपी पवार याच्यावर वॉच ठेवून त्याला ताब्यात घेतले. त्याच्याकडे सखोल चौकशी केली असता तळेगाव एमआयडीसी पोलिस ठाण्यात दाखल असलेला घरफोडीचा गुन्हा त्याने त्याच्या इतर तीन साथीदारांसह केल्याचे कबूल केले. आरोपी पवार याच्याकडून पिंपरी आयुक्तालयाच्या हद्दीतील हिंजवडी, देहूरोड, भोसरी, चाकण व आळंदी पोलिस ठाण्यातील घरफोडीचे पाच गुन्हे उघडकीस आले आहेत.

हेही वाचा :

Mutual Fund च्या तीन जबरदस्त स्कीम; वर्षभरात लाखाचे होतील दोन लाख

पोस्टाची भन्नाट योजना; आता घरबसल्या प्रत्येक महिन्याला होणार कमाई

अशी 9 कामे जी तुम्हाला 31 मार्चच्या आधीच करावी लागतील पूर्ण

दरम्यान, आरोपी पवार याने घरफोडी करून चोरी केलेले दागिने तो एका व्यापाऱ्याकडे विक्री करीत होता. गुन्ह्यातील मुद्देमाल त्याने एका व्यापाऱ्याला दिल्याचे सांगितले. त्यानुसार पोलिसांनी संदीप अंकुश केत (रा. सम्राट चौक, अक्कलकोट, जि. सोलापूर), या व्यापाऱ्याला अटक केली. त्याला सहा दिवस पोलिस कोठडी सुनावण्यात आली आहे.