नियमांचे उल्लंघन केल्यास कारवाई

वडगाव मावळ, ता. १० : ‘‘कोरोनाचा वाढता प्रादुर्भाव लक्षात घेऊन सरकारने घातलेल्या निर्बंधांची व्यावसायिक व नागरिकांनी काटेकोरपणे अंमलबजावणी करावी,’’ असे आवाहन वडगावचे पोलिस निरीक्षक विलास भोसले यांनी केले आहे. नियमांचे उल्लंघन करणाऱ्यांवर सोमवारपासून कारवाई करण्यात येणार करण्यात येणार असल्याची माहिती त्यांनी दिली.
सरकारने घालून दिलेल्या नियमानुसार सर्व हॉटेल्स, रेस्टॉरंट रात्री दहा वाजता बंद होतील. रात्री अकरा ते सकाळी पाच या वेळात संचारबंदी असेल. कोणीही अत्यावश्यक कारण वगळता घराबाहेर दिसल्यास त्यांच्यावर कारवाई होईल. अत्यावश्यक कारण म्हणजे काय हे सरकारच्या देशांमध्ये नमूद करण्यात आले आहे. निर्बंधांबाबत पोलिस ठाण्याचे सर्व प्रभारी अधिकारी पोलिस स्टेशनच्या वाहनांमधून मुख्य बाजारपेठा व सार्वजनिक ठिकाणी जनजागृती करतील. नगरपंचायत व ग्रामपंचायतींही निर्बंध व दंड याबाबत लोकांना जागृत करतील. सुरुवातीला लोकांना केवळ वॉर्निंग देण्यात येईल व त्यांचे फोटो घेऊन ग्रुपवर टाकण्यात येतील व लेखी पत्र देऊन अवगत करण्यात येईल. सोमवारपासून दंडात्मक कारवाईला सुरुवात होईल, अशी माहिती भोसले यांनी दिली.

सार्वजनिक कार्यक्रमांवर निर्बंध
- मंगल कार्यालय व रिसॉर्ट यांनी विवाह समारंभासाठी येणाऱ्या पन्नास लोकांची यादी सादर करणे आवश्यक
- राजकीय, सामाजिक, सांस्कृतिक कार्यक्रमांना पन्नासपेक्षा अधिक अशी परवानगी देता येणार नाही.
- कार्यक्रमाचे उल्लंघन केल्यास आयोजकांवर गुन्हे दाखल करण्यात येणार
- क्रिकेट, फुटबॉल आदींच्या स्पर्धा भरविण्यास बंदी
- पर्यटन स्थळे, किल्ले या ठिकाणी पर्यटक गर्दी करणार नाहीत यासाठी फिक्स्ड पॉइंट बंदोबस्त