वेश्यव्यवसाय सुरू असलेल्या लॉजवर छापा

पिंपरी, ता. २८ : पिंपरी-चिंचवड पोलिसांच्या सामाजिक सुरक्षा पथकाने वेश्याव्यवसाय सुरू असलेल्या, लॉजवर छापा टाकून पाच महिलांची सुटका केली. याप्रकरणी चौघांवर गुन्हा दाखल झाला आहे.
लॉजचा मॅनेजर प्रसन्नाकुमार मंजुनाथ शेट्टी (वय ४७, स्वराजनगर, गोकुळधाम सोसायटी, तळेगाव स्टेशन जवळ, तळेगाव दाभाडे), वेश्याव्यवसायासाठी महिला पुरविणारा रॉकी कुमार गुप्ता, लॉजचा चालक-मालक दिनेश अमरनाथ शेट्टी, सुधाकर शाम शेट्टी (रा. गंगा असोसिएशन मेडोज, थेरगाव) अशी गुन्हा दाखल झालेल्यांची नावे आहेत. शिरगाव येथील सोमाटणे फाटा ते शिरगावकडे जाणाऱ्या रस्त्यालगत असलेल्या साई सत्यम लॉज ॲण्ड बोर्डिंग'' येथे आरोपी हे महिलांकडून जबरदस्तीने वेश्याव्यवसाय करवून घेत असल्याची माहिती पथकाला मिळाली. त्यानुसार बनावट गिऱ्हाईक पाठवून तपासणी केली असता, येथे वेश्याव्यवसाय सुरू असल्याचे स्पष्ट झाले. त्यानंतर येथे छापा टाकून पाच पीडित महिलांची सुटका करून त्यांची रवानगी हडपसर येथील महिला सुधारगृहात करण्यात आली. या कारवाईत १५ हजार ६६० रुपयांची रोकड, आठ हजारांचा मोबाईल व इतर साहित्य असा एकूण २३ हजार ७३० रुपयांचा मुद्देमाल जप्त केला. याप्रकरणी तळेगाव दाभाडे पोलिस ठाण्यात गुन्हा दाखल झाला असून पोलिस अधिक तपास करीत आहेत.