महापालिका निवडणुकीबाबत संभ्रमावस्था | Sakal
sakal

बोलून बातमी शोधा

महापालिका निवडणुकीबाबत संभ्रमावस्था
महापालिका निवडणुकीबाबत संभ्रमावस्था

महापालिका निवडणुकीबाबत संभ्रमावस्था

sakal_logo
By

पिंपरी, ता. २ ः कोरोना व ओमिक्रॉनचा वाढता संसर्ग, ओबीसी आरक्षणाबाबत राज्य सरकारची भूमिका, तीन सदस्यीय प्रभाग रचना व क्षेत्रसभेबाबत सामाजिक कार्यकर्त्यांनी उच्च न्यायालयात दाखल केलेली याचिका आणि मध्यप्रदेश सरकारने ओबीसीच्या मुद्द्यांवरून पुढे ढकललेल्या स्थानिक स्वराज्य संस्थांच्या निवडणुका यामुळे आगामी महापालिका निवडणूक होणार की नाही, याबाबत प्रशासनासह शहरातील इच्छुकांच्या मनात संभ्रमावस्था आहे. असे असले तरी, राज्य निवडणूक आयोगाकडून प्रभाग रचना व अन्य कार्यक्रमांची तयारी सुरू आहे. त्यामुळे नियोजित वेळेत निवडणूक घेण्याची आयोगाची तयारी दिसत आहे. मात्र, निवडणूक वेळेत होईल की, ती पुढे ढकलली जाऊन प्रशासकाची नियुक्ती केली जाईल, याबाबतचे चित्र आगामी पंधरा दिवसांत स्पष्ट होणार आहे. दरम्यान, प्रभाग रचनेच्या कच्च्या आराखड्याचे सादरीकरण गुरुवारी (ता. ६) मुंबईत राज्य निवडणूक आयोगासमोर होणार आहे.
महापालिका आगामी निवडणूक तीन सदस्यीय प्रभाग पद्धतीने घेण्याचा निर्णय राज्य सरकारने घेतला आहे. त्यानुसार निवडणूक आयोगाने प्रशासनाकडून प्रभाग रचनेचा प्रारुप प्रस्ताव अर्थात कच्चा आराखडा तयार करून घेतला आहे. त्याचे सादरीकरण गुरुवारी होईल. त्यात आयोगाने काही बदल सुचविल्यास, त्यानुसार बदल करून त्यावर हरकती व सूचना मागविल्या जातील. त्यावर सुनावणी होऊन अंतिम प्रभाग रचना जाहीर होईल. त्यानंतर आरक्षण सोडत व निवडणूक कार्यक्रम जाहीर होऊ शकतो. दरम्यान, महापालिकेची मुदत १३ मार्च रोजी संपत असल्याने अद्याप सव्वादोन महिन्यांचा कालावधी आहे. त्यामुळे महापालिका निवडणूक वेळेत होण्याची शक्यता आहे. मात्र, त्याला कोरोना व ओमिक्रॉनसारख्या नैसर्गिक अडथळे आहेत. शिवाय, ओबीसी आरक्षण, तीन सदस्यीय प्रभाग पद्धतीला विरोध व क्षेत्र सभेबाबतचा निर्णय याबाबत उच्च न्यायालयात दाखल याचिकेवरील पुढील सुनावणी १० जानेवारी रोजी आहे. त्यात काय निर्णय होतो व निवडणूक आयोग काय निर्णय घेते, यावरच महापालिका निवडणूक होणार की नाही, हे ठरणार आहे.

‘‘तीन सदस्यीय प्रभाग पद्धतीमुळे क्षेत्रसभा घेणे अडचणीचे ठरणार आहे. सभेचा अध्यक्ष प्रभागाचा नगरसेवक असतो. त्यामुळे एक सदस्यीय प्रभाग पद्धती योग्य ठरते. मात्र, तीन सदस्यांमधून अध्यक्ष कसा निवडणार, सभा कशी घेणार, याबाबत राज्य सरकारने स्पष्ट उल्लेख केलेला नाही. याबाबत उच्च न्यायालयात याचिका दाखल केली आहे. त्यावर १० जानेवारी रोजी सुनावणी होणार आहे. शिवाय, कोरोना व ओमिक्रॉनचा संसर्ग वाढतो आहे. तो असाच वाढत राहिल्यास निवडणूक लांबणीवर पडू शकते. मात्र, निवडणूक आयोग त्यांची प्रक्रिया पूर्ण करत असल्याने ठरलेल्या वेळेतच निवडणूक घेण्याची त्यांची तयारी दिसत आहे.’’
- मारुती भापकर, सामाजिक कार्यकर्ते व माजी नगरसेवक


असा होता २०१७ चा निवडणूक कार्यक्रम
तारीख / तपशील
२० ऑगस्ट २०१६ / प्रभाग रचना, आरक्षण सोडत कार्यक्रम जाहीर
२३ सप्टेंबर २०१६ / प्रारुप प्रभाग रचना प्रस्तावास आयोगाची मान्यता
४ ऑक्टोबर २०१६ / आरक्षण सोडत कार्यक्रम जाहीर
७ ऑक्टोबर २०१६ / अनुसूचित जाती, जमाती, ओबीसी व महिलांसाठी आरक्षण सोडत काढली
५ जानेवारी २०१७ / मतदार यादी ग्राह्य धरण्याचा दिनांक
२७ जानेवारी २०१७ / महापालिका आयुक्तांकडून निवडणूक कार्यक्रमाची सूचना प्रसिद्ध
३ फेब्रुवारी २०१७ / उमेदवारी अर्ज स्विकारण्याची शेवटची तारीख
४ फेब्रुवारी २०१७ / उमेदवारी अर्जांची छाननी, वैध उमेदवारांची यादी प्रसिद्ध
७ फेब्रुवारी २०१७ / उमेदवारी अर्ज माघार घेण्याची शेवटची तारीख
८ फेब्रुवारी २०१७ / उमेदवारांना चिन्ह वाटप, अंतिम यादी, मतदान केंद्र व केंद्र निहाय मतदार यादी प्रसिद्ध
२१ फेब्रुवारी २०१७ / मतदानाचा दिवस
२३ फेब्रुवारी २०१७ / निवडणूक निकाल जाहीर
१३ मार्च २०१७ / पहिला सर्वसाधारण सभा, महापौर व उपमहापौर निवड, नवीन सदस्यांचा कार्यकाल सुरू
---

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
loading image
go to top