पदरेशातील मराठी मुलांसाठी कविता सादरीकरण स्पर्धा

पुणे, ता. २४ : ‘रोटरी क्लब ऑफ पुणे, हेरिटेज’तर्फे परदेशातील मराठी मुलांसाठी कविता सादरीकरण स्पर्धेचे आयोजन करण्यात आले असल्याची माहिती क्लबचे अध्यक्ष विनायक पेठे यांनी दिली. ते म्हणाले, ‘‘बालसाहित्यात महत्त्वाचे योगदान देणाऱ्या ज्येष्ठ साहित्यिका शकुंतला फडणीस यांच्या प्रथम स्मृतिदिनानिमित्त आयोजित केलेल्या या स्पर्धेतील विजेत्यांना पारितोषिके देण्यात येणार आहेत. बारा वर्षे वयापर्यंतच्या मुलांना या स्पर्धेत सहभागी होता येणार आहे. या स्पर्धेसाठी प्रवेश नि:शुल्क आहे. यात मुलांनी आपल्या आवडीची कुठलीही मराठी कविता पाठ करून ती सादर करायची असून त्याचा व्हिडिओ पाठवायचा आहे. अधिक माहितीसाठी लीना गोगटे (मोबाईल क्रमांक ९८२३२५६६६२) किंवा अविनाश ओगले (९३७३७६४२४७) यांच्याशी संपर्क साधावा.’’