चिंचवडमध्ये टोळक्याने माजवली दहशत

चिंचवडमध्ये टोळक्याने माजवली दहशत

पिंपरी, ता. १३ : दुचाकीवरून आलेल्या टोळक्याने कोयते व तलवार भिरकावून दहशत माजवली. तसेच परिसरातील दहा वाहनांची तोडफोड केली. या घटनेमुळे नागरिक सैरावैरा पळू लागले, दारे, खिडक्या बंद करून घरात बसले. हा प्रकार चिंचवड येथे घडला.

याप्रकरणी ज्ञानेश्वर रामभाऊ सूर्यवंशी (रा. ओम कॉलनी क्रमांक ३, चिंचवड) यांनी फिर्याद दिली आहे. त्यानुसार शिवानंद हेळवे, बसवराज हेळवे, आदित्य आंबुसकर, सोमनाथ माने, शाम कोळी व त्यांचे साथीदार यांच्यावर गुन्हा दाखल झाला आहे. आरोपी हे फिर्यादी यांच्या ओळखीचे आहेत. फिर्यादींसोबत असलेल्या पूर्व वैमनमस्यातून बुधवारी (ता. १२) रात्री पावणे बाराच्या सुमारास आरोपी दरोडा घालण्याच्या उद्देशाने ओम कॉलनी क्रमांक तीन येथे हातात कोयते व तलवार घेऊन आले. फिर्यादी यांच्या बंगल्याच्या गेटवर कोयते व तलवार मारून फिर्यादी व त्यांच्या मुलाच्या नावाने शिवीगाळ केली. तसेच कॉलनीतील लोकांना मोठमोठ्याने शिवीगाळ करून हातातील कोयते व तलवार भिरकावत दहशत माजवली. यामुळे कॉलनीतील लोक त्यांना घाबरून सैरावैरा पळू लागले. घराचे दरवाजे खिडक्या बंद करून घरात जाऊन बसले. त्यानंतर आरोपींनी कॉलनीत राहणाऱ्या लोकांच्या दहा गाड्या फोडून नुकसान केले. तसेच फिर्यादी यांचे शेजारी रोहित अनिल पवार यांच्या मोटारीतून दहा हजारांची रोकड दरोडा घालून चोरून नेली. याप्रकरणी चिंचवड पोलिस ठाण्यात गुन्हा दाखल असून पोलिस अधिक तपास करीत आहेत.