बनावट कागदपत्रांद्वारे दिले पाऊण कोटीचे कर्ज

पिंपरी, ता. २३ : बनावट कागदपत्रांद्वारे अनोळखी व्यक्तीला ७४ लाख ९१ हजार रुपयांचे कर्ज मिळवून दिल्याप्रकरणी अ‍ॅक्सिस बँकेच्या तत्कालीन व्यवस्थापकासह गृह कर्ज विभागातील कर्मचारी , प्रतिनिधी व कर्ज घेणाऱ्या अनोळखी व्यक्तीवर फसवणूकीचा गुन्हा दाखल झाला आहे. हा प्रकार चिंचवडमधील अ‍ॅक्सिस बँक येथे घडला.
याप्रकरणी शिवकुमार महालिंगप्पा बेलुरे (रा. दळवीनगर, चिंचवड) यांनी चिंचवड पोलिस ठाण्यात फिर्याद दिली आहे. चिंचवड येथील अ‍ॅक्सिस बँकेचे तत्कालीन व्यवस्थापक, गृह कर्ज विभागातील कर्मचारी, एजंट व अनोळखी व्यक्ती यांनी संगनमताने फिर्यादी यांची बनावट कागदपत्रे तयार केली. या कागदपत्रांचा दुरुपयोग करून फिर्यादी यांच्या नावे अनोळखी व्यक्तीला ७४ लाख ९१ हजार रूपयांचे कर्ज दिले. यातून फिर्यादी व बँकेची फसवणूक केली. हा प्रकार १ जानेवारी ते २० मार्च २०२१ या कालावधीत घडला. याप्रकरणी चिंचवड पोलिस ठाण्यात गुन्हा दाखल असून पोलिस अधिक तपास करीत आहेत.
-----------------------