उर्से खिंडीतील कचरा पुन्हा रस्त्यावर

उर्से, ता.२७ : निसर्गाला आपण जे काही देतो. त्याची तो परतफेड करतो, असे कोणीतरी म्हटलं आहे. हे वाक्य सध्या उर्से खिंडीतील रस्त्याला लागू होत आहे. सुमारे दोन वर्षांपासून या खिंडीत कचरा टाकला जात असताना पावसाच्या पाण्याने सर्व कचरा वाहून पुन्हा रस्त्यावर आला आहे.
उर्से खिंड आणि तेथील रस्त्याचा वापर कचरा टाकण्यासाठी केला जात आहे. मात्र, याबाबत ना ग्रामपंचायतीने नोंद घेतली; ना तळेगाव नगर परिषदेने दखल घेतली. अनेकजण रात्रीच्यावेळेस अंधाराचा फायदा घेत कचरा टाकत होते. बघता बघता कचऱ्याचे प्रमाण वाढत गेले. त्या ठिकाणी कचरा टाकण्याची जागाच तयार झाली. नैसर्गिक सौंदर्याने नटलेला उर्से खिंडीतील हा भाग असल्याने निसर्गालाही ते कदाचित आवडले नसावे. त्यामुळे, गेल्या दोन दिवसांपासून पडणाऱ्या मुसळधार पावसामुळे हा सर्व कचरा रस्त्याच्या मधोमध, बाजूला आणि दुकानांसमोर पसरला गेला आहे. शिवाय, गटारातील पाणी वाहू लागले. त्यातील प्लास्टिकचा कचराही खिंडीतील रस्त्यावर सर्वत्र पसरलेला पाहायला मिळाला.