महिलांसाठी भात पीक शेतीशाळा उत्साहात

उर्से, ता. १७ :  महाराष्ट्र शासन कृषि विभाग, कृषि तंत्रज्ञान व्यवस्थापन यंत्रणा (आत्मा) अंतर्गत महिलांसाठी भात पीक शेतीशाळेचे आयोजन प्रकल्प संचालक (आत्मा) पुणे सूरज मडके व तालुका कृषि अधिकारी, मारुती साळे यांच्या मार्गदर्शनाखाली आढले खुर्द येथे करण्यात आले.
शेतकरी, शेतीशाळा ही शेतकऱ्यांना पिकांच्या लागवडीपासून ते काढणीपर्यंत विविध टप्प्यामध्ये जसे भात बियाणे निवड, गादी वाफ्यावर रोपे तयार करणे, नियंत्रित लागवड करणे, युरिया ब्रिकेटचा वापर करणे, एकात्मिक कीड व रोग व्यवस्थापन, काढणी पश्चात तंत्रज्ञान व विक्री व्यवस्थान याबाबत मार्गदर्शन करण्यासाठी राबविली जाते. या अंतर्गत भात पिकाची शेतीशाळा मौजे-आढले खुर्द येथे राबविण्यात आली. यावेळी मंडळ कृषी अधिकारी नागेश शिंदे, भात संशोधन केंद्र, वडगावचे शास्त्रज्ञ एस. एम. कदम, सरपंच नंदा भालसेन तसेच शेतीशाळेतील महिला शेतकरी उपस्थित होते.
यावेळी शेतकऱ्यांना विविध प्रात्यक्षिके दाखविण्यात आली. महिला शेतकऱ्यांना शेतीशाळा किटचे वाटप करण्यात आले. या शेतीशाळेचे नियोजन आढले गावच्या सहाय्यक कृषि अधिकारी एम.बी. घोडके, एस. एस. कानडे व राहुल घोगरे यांनी केले. भात पिकाबद्दल सविस्तर माहिती मिळाल्यामुळे महिला वर्गातून समाधान व्यक्त करण्यात आले.