बाळूमामा पालखी दर्शनासाठी ऊर्से येथे भाविकांची मोठी गर्दी

ऊर्से, ता. २३ : येथे संत बाळूमामा पालखीचे आगमन झाले आहे. सुमारे दोन हजार मेंढ्यांसह अनेक सेवेकरी या पालखीसमवेत गावात दाखल झाले असून, गेल्या आठवड्यापासून पंचक्रोशीतील भाविक दर्शनासाठी येत आहेत.
आदमापूर येथील श्री संत बाळूमामा देवालयाची बाळूमामा पालखी गेल्या आठ दिवसांपासून मावळ तालुक्यात मुक्कामी आहे. पालखी आणि मामांच्या मेंढ्यांच्या दर्शनासाठी दररोज भाविक मोठी गर्दी करीत आहेत. मामांच्या मेंढ्या आपापल्या गावात आणण्यासाठी ग्रामस्थांची रांग लागली आहे. श्री संत सद्‍गुरु बाळूमामा देवालय ट्रस्टचे कारभारी यांच्या मार्गदर्शनाखाली बाळूमामांची सुमारे दोन हजार मेंढ्या आणि पालखीसोबत पन्नासच्यावर सेवेकरी ऊर्से गावात दाखल झाले आहेत. येथील गायरानातील परिसरात मुक्काम ठेवण्यात आला आहे. या ठिकाणी आरती, महाप्रसाद, कीर्तन आदी धार्मिक कार्यक्रम सुरू आहेत. परिसरातील हजारो भाविक दर्शनाला येत आहेत. बाळूमामांच्या मेंढ्यांनी आपल्या शेतात पायधूळ झाडावी म्हणून भाविक आग्रह करीत आहेत. मुक्काम असल्याने सोहळ्याचा संपूर्ण खर्च गावातील ग्रामस्थ व दानशूर व्यक्तींकडून केला जात आहे. रात्रीच्या आरतीला दररोज हजारोच्या आसपास भाविक उपस्थित राहतात. सर्वांना महाप्रसादाचे वाटप केले जात आहे.