‘वेस्ट टू एनर्जी’ प्रकल्पाचे काम अंतिम टप्प्यात

भोसरी, ता. २२ : पिंपरी-चिंचवड महापालिकेच्या पुढाकाराने कचऱ्यापासून वीजनिर्मितीसाठी असणाऱ्या ‘वेस्ट टू एनर्जी’ प्रकल्पाचे काम अंतिम टप्प्यात आले आहे. दुसऱ्या टप्प्यातील महावितरणच्या इंद्रायणी सबस्टेशन ते मोशीतील कचरा डेपोपर्यंत पावर लाइन टाकण्याच्या कामाचे भूमिपूजन आमदार महेश लांडगे यांच्या हस्ते करण्यात आले.
यावेळी महावितरणचे कार्यकारी अभियंता उदय भोसले, दीपक मदने, प्रमोद भोसले, मोहिनी गुळुमकर, महापालिकेचे कार्यकारी अभियंता अनिल भालसाखले, उपकार्यकारी अभियंता सत्वशील शितोळे, कनिष्ठ अभियंता दशरथ वाघोले, संदीप जाधव आदी उपस्थित होते.
महापालिकेचे कार्यकारी अभियंता अनिल भालसाखले म्हणाले, ‘‘महापालिकेच्या ‘वेस्ट टू एनर्जी’ या प्रकल्पाचे काम अखेरच्या टप्यात असून, ‘पॉवर लाइन’ टाकण्याचे काम सुरू झाले आहे. साधारण ’पॉवर लाइन’ ची लांबी ४.५ किलोमीटर इतकी हे. या प्रकल्पातून निर्माण होणारी वीज प्रती युनिट पाच रुपये प्रमाणे आगामी २० वर्षांसाठी प्रशासनाला मिळणार आहे. यामुळे महापालिकेच्या वीज बिलामध्ये बचत होणार असून, कचऱ्याचा प्रश्नही सुटण्यास मदत होणार आहे. प्रकल्पाची वीजनिर्मिती क्षमता दिवसाला १४ मेगावॉट आहे.

‘‘शहराच्या स्थापनेपासून मोशी कचरा डेपोवर कचरा टाकला जातो. त्यामुळे कचऱ्याचे डोंगर निर्माण झाले. परिणामी, पर्यावरण आणि नागरी आरोग्याचा प्रश्न निर्माण झाला होता. ‘भोसरी व्हीजन-२०२०’ च्या माध्यमातून आम्ही राज्यातील महत्वकांक्षी रोल मॉडेल प्रकल्प ‘वेस्ट टू एनर्जी’ हाती घेतला. हा प्रकल्प कार्यान्वित होत असून, लवकरच निर्माण होणारी वीज महापालिका प्रशानाला मिळणार आहे. त्यामुळे आश्वासन पूर्तीचा आनंद आहेच. त्यासोबत शहरातील कचरा समस्या सोडवण्यात यश मिळत आहे. याचे समाधान वाटते.’’
- महेश लांडगे, आमदार, भाजप