महामार्गावरील न भरलेल्या साईट पट्ट्यांमुळे धोका

भोसरी, ता. ११ ः पुणे-नाशिक महामार्गाच्या गुडवील चौक ते स्पाइन रस्त्यावरील राजे छत्रपती शिवाजी महाराज चौकापर्यंतच्या रस्त्यावरील दोन्ही बाजूकडच्या साइडपट्ट्या भरल्या गेलेल्या नाहीत. त्यामुळे दुचाकी वाहन चालकांना अपघाताचा धोका निर्माण झाला आहे.
भोसरीतील पुणे-नाशिक महामार्गाच्या रस्त्यावर गुडवील चौक आणि लांडेवाडीतील ऐतिहासिक प्रवेशद्वाजवळील चौकात वाहतूक नियंत्रक दिवे बसवले आहेत. त्यामुळे वाहने येथे थांबतात. काही दुचाकी चालक रस्त्याच्याखाली उतरून पुढे जाण्याचा प्रयत्न करतात. मात्र येथील रस्त्याची साइडपट्टी भरली गेलेली नाही. काही ठिकाणी अर्धा ते एक फुटापर्यंत रस्त्याच्याकडेला खड्डे पडलेले आहेत. त्यामुळे दुचाकी चालक रस्त्यावर येण्याचा प्रयत्न करत असताना दुचाकी घसरून त्यांना अपघाताला सामोरे जावे लागत आहे. दुचाकी चालक रस्त्यावरच घसरून पडत असल्यामुळे पाठीमागून येणाऱ्या वाहनामुळे अपघात होण्याची शक्यता असल्याने त्यांच्या जीवितास धोका निर्माण झाला आहे. त्याचप्रमाणे धावडेवस्ती ते स्पाइन रस्त्यावरील राजे छत्रपती शिवाजी महाराज चौकापर्यंतच्या रस्त्यावरील साइडपट्टी भरली गेलेली नाही. त्यामुळे या ठिकाणीही दुचाकी चालकांना अपघात होण्याची शक्यता निर्माण झाला आहे. या रस्त्यावरील साइडपट्ट्या तातडीने भरण्याची मागणी वाहनचालकांधून होत आहे.