भोसरी, दिघी, इंद्रायणीनगरात रस्त्यांवर पाणी साचण्याचे प्रकार

भोसरी, ता. २७ ः भोसरी, दिघी, इंद्रायणीनगर परिसरात शुक्रवारी (ता. २५) आणि शनिवारी (ता.२६) पडलेल्या जोरदार पावसामुळे रस्त्यावर जागोजागी पाणी साचल्याने वाहन चालकांना वाहने चालविताना कसरत करावी लागली. रस्त्यावरील खड्ड्यांत वाहने अडकून पडण्याच्या घटना घडल्या. त्यामुळे वाहन चालक आणि नागरिकांमधून संताप व्यक्त होत आहे.
भोसरीतील दिघी रस्त्यावरील गंगोत्री पार्कमधील बॅडमिंटन हॉलच्या पाठीमागील रस्ता, भोसरीतील आळंदी रस्त्यावर बनाच्या ओढ्याजवळ वाळके वस्ती आणि चक्रपाणी वसाहतीकडे जाणारा रस्ता, पुणे - नाशिक महामार्गावर राजमाता जिजाऊ उड्डाणपुलाच्या सुरूवातीला संत तुकाराम मंगल कार्यालयासमोर, पांजरपोळजवळ, दिघीतील पुणे-आळंदी पालखी मार्गावर मॅगझीन चौक, जुना जकात नाका ते मांढरदेवी - काळुबाई मंदिरापर्यंतचा रस्ता, भोसरीतील इंद्रायणीनगरमधील पेठ क्रमांक एकमधील महापालिकेच्या वैष्णोमाता शाळा ते निर्भया उद्यानापर्यंतच्या रस्ता, पेठ क्रमांक दोनमधील संत ज्ञानेश्वर क्रीडा संकुलसमोरील रस्ता, पेठ क्रमांक तीनमधील संतनगर बस थांब्याजवळ आदी भागांसह इतरही भागांत पावसाचे पाणी साचत आहे. दर पावसात ही स्थिती उद्‍भवत असतानाही महापालिकेद्वारे समस्या कायमस्वरुपी सोडविण्यासाठीची उपाय योजना केली जात नसल्याबद्दल नागरिकांमधून संताप व्यक्त होत आहे. गंगोत्री पार्कमधील रहिवासी अविनाश चौधरी म्हणाले,‘‘शनिवारी (ता. २६) सकाळच्या वेळेसच रस्त्यावर पाणी साचल्याने शाळेत विद्यार्थ्यांना जाताना पाण्यातून वाट काढावी.’’