धम्म ग्रंथ पारायणासह पर्यावरणाचे संवर्धन

भोसरी, ता. ४ ः वर्षावासात बौद्ध बांधवांद्वारे विश्वरत्न डॉ. बाबासाहेब आंबेडकर लिखित ‘बुद्ध आणि त्यांचा धम्म’ या ग्रंथांसह इतर धम्म ग्रंथांचे पारायण केले जाते. बौद्धिक विकासासह पर्यावरणाचेही संवर्धन व्हावे या विचारातून मागील तीन वर्षांपासून मोशीतील प्रबुद्ध मैत्री संघाद्वारे बौद्ध लेण्यांसह अन्य ठिकाणी वृक्षरोपणाचा अनोखा उपक्रम हाती घेण्यात येत आहे.
बौद्ध बांधवांचा वर्षावास आषाढ पौर्णिमेला सुरू होतो; तर अश्विन पौर्णिमेला संपतो. त्यामुळे संपूर्ण पावसाळ्यात हा वर्षावास सुरू असतो. या वर्षावासानिमित्त वृक्षांचे रोपण करण्यासाठी प्रबुद्ध मैत्री संघाच्या बुद्ध विहाराद्वारे प्रबुद्ध मैत्री संघ वृक्ष संवर्धन समितीची स्थापना करण्यात आली. या समितीत राजू कांबळे, ज्ञानेश्वर दांडगे, संतोष तायडे, सुभाष वाकळे, अशोक तूपसौंदर, नरेंद्र प्रगणे, चंद्रकांत चिकटे, जयदेव पुंडकर, साहेबराव गोपाळे, मारुती तुरुकमारे, गजानन वारुळे, अड. प्रताप जाधव, रमेश केदारी, भाऊसाहेब डोळस आदींचा समावेश आहे.
जागतिक तापमान वाढीमुळे पर्यावरणाचा होणारा ऱ्हास यामुळे भविष्यात मानवी जीवन धोक्यात येत आहे. प्रत्येकाने किमान एक झाड लावून ते जगवले; तर मोठ्या प्रमाणात पर्यावरण संवर्धन होऊ शकते, असा प्रसार आणि प्रचार समितीद्वारे नागरिकांमध्ये केला जातो. याच विचारातून समितीद्वारे मोशीतील आंतरराष्ट्रीय प्रदर्शन केंद्रात या पावसाळ्यात शंभर वृक्षांचे रोपण करण्यात आले. त्याचप्रमाणे विविध झाडांच्या शंभर बियाही या ठिकाणी रुजविण्यात आल्या आहेत. समितीद्वारे वर्षावासात विविध लेण्यांना भेटी देऊन त्या ठिकाणीही वृक्षारोपण करण्यात येते. आतापर्यंत भाजे, बेडसे, अंबाअंबिका, कार्ला, येलघोल, भंडारा, कोंडाणे, कपोचित, कान्हेरी, आदींसह इतरही लेण्यांमध्ये भेटी देऊन दोनशे वृक्षांचे रोपण करण्यात आले. समितीद्वारे दर गुरुवारी आणि रविवारी वृक्षारोपणाचा कार्यक्रम राबवण्यात येतो. यावेळी वृक्षारोपण करण्याबरोबरच नागरिकांमध्ये वृक्षारोपणासाठी जनजागृतीही करण्यात येत असल्याची माहिती राजू कांबळे यांनी दिली.

वाढदिवसानिमित्त झाडे लावा
प्रबुद्ध मैत्री संघ वृक्ष संवर्धन समितीद्वारे वाढदिवसानिमित्त झाडे लावण्याचे आवाहन नागरिकांना करण्यात येते. त्यामुळे परिसरातील बुद्ध विहारात वाढदिवसानिमित्त झाडे लावण्याच्या उपक्रमाला सुरूवात झाली आहे. या उपक्रमाला नागरिकांद्वारेही चांगला प्रतिसाद मिळत असल्याचे समितीने सांगितले.