चऱ्होलीच्या नावावर पोस्ट विभागाची ‘मोहोर’ ‘चऱ्होली उप डाकघर’चे उद्‍घाटन मोहर

चऱ्होली, ता. ९ : आमदार महेश लांडगे, माजी महापौर नितीन काळजे, पुणे विभागाचे वरिष्ठ अधिकारी रामचंद्र जायभाये, तसेच पुणे ग्रामीण पोस्ट विभागाचे अधीक्षक बाळकृष्ण एरंडे आदी मान्यवरांच्या हस्ते चऱ्होलीची नवीन ओळख म्हणून ‘चऱ्होली उप डाकघर ४११०८१’ या पिनकोडसह नवीन कोनशिलेचे अनावरण करण्यात आले.
चऱ्होलीला नवीन नावलौकिक मिळवण्याच्या दृष्टीने २०२२ पासून ‘उप डाकघर’ साठी केलेला पाठपुरावा, परिसराचा होत असलेला कायापालट, पायाभूत सुविधा तसेच परिसरातील विकासाभिमुख राबविण्यात आलेले प्रकल्प यावर प्रकाश टाकण्यात आला.
यावेळी पुणे पोस्ट ऑफिसचे विभागीय अधिकारी जायभाये यांनी येथील वाढत असलेली लोकसंख्या विचारात घेता योग्य संख्येने कर्मचारी उपलब्ध करून देण्यात येतील, असे आश्वासन दिले. पोस्ट ऑफिसच्या माध्यमातून राबविल्या जाणाऱ्या सर्व योजनांची माहिती दिली. यावेळी पुणे परिमंडळातील अधिकारी, कर्मचाऱ्यांसह युवा नेते माजी नगरसेवक सचिन तापकीर, अजित बुर्डे, नगरसेविका सुवर्णा बुर्डे, अरूण काळजे, अनिकेत तापकीर, सुरेश तापकीर आणि चऱ्होली ग्रामस्थ उपस्थित होते.

फोटोः ००१४१