चिंचवडमधील रस्ता खचून मोठा खड्डा

चिंचवड, ता.२१ ः केएसबी चौकाकडून थरमॅक्स चौकाकडे जात असताना मुख्य रस्त्यावर, एचडीएफसी कॉलनी जवळील बीएसएनएल प्रशिक्षण केंद्रासमोरील रस्ता मोठ्या प्रमाणात खचला असून त्यावर मोठा खड्डा पडला आहे. त्याच्या आतील बाजूला पोकळी निर्माण झाली असल्याने खड्ड्यात मोठ्या वजनाचे वाहन गेले; तर ते अडकून पडण्याची भीती व्यक्त केली जात आहे.
या रस्त्याला उंदीर, घुशी लागल्या आहेत. त्याच्या खालून सांडपाण्याचा मोठा नाला गेला आहे. कदाचित, त्यामुळेच हा मोठा खड्डा तयार झाला असावा, असा अंदाज व्यक्त केला जात आहे. सुमारे तीन महिन्यांपूर्वी महापालिकेच्या अधिकाऱ्यांना या प्रकाराची नागरिकांनी कल्पना दिली होती. परंतु त्यावेळी तात्पुरत्या स्वरूपात फक्त मोकळी खडी व रेती यामध्ये टाकली होती. परंतु खाली मोठी पोकळी असल्याने टाकलेली खडी वाहून गेली आहे.
या खड्ड्याने अनेक दुचाकीस्वार आणि सायकलस्वार आपटल्याच्या घटना समोर आल्या आहेत. वाहनांचे नुकसान देखील झाले असून भविष्यात मोठा अपघात होण्याची शक्यता निर्माण झाली आहे.

येथे वारंवार अपघात होत असतात. परंतु सुदैवाने अद्याप कोणतीही गंभीर दुखापत झाली नाही. परंतु ही गंभीर गोष्ट आहे. यापूर्वी या खड्ड्यामध्ये तात्पुरत्या स्वरूपात फक्त खडी माती टाकली होती. परंतु पुन्हा मोठा खड्डा पडला आहे. लवकरात लवकर पक्के काम करावे, अशी प्रशासनाला विनंती आहे. अन्यथा मोठा अपघात होण्याची शक्यता नाकारता येत नाही.
- प्रदीप साळुंखे, स्थानिक रहिवासी, संभाजीनगर

जेथे पडलेले आहे त्या ठिकाणी आमचे संबंधित अधिकारी जाऊन त्यावर नक्कीच उपाययोजना केली जाईल"
- विजय भोजने, कार्यकारी अभियंता, प्रकल्प विभाग (बीआरटीएस)

CWD25A01362