गंगानगर -चिंचवड स्थानक रस्त्याची महापालिकेकडून अखेर दुरुस्ती

सकाळ इम्पॅक्ट

चिंचवड, ता.२२ ः आकुर्डी, गंगानगर ते चिंचवड रेल्वे स्थानकाकडे जाणाऱ्या मुख्य रस्त्याची महापालिकेच्या ‘अ’ क्षेत्रीय कार्यालयाकडून दुरुस्ती करण्यात आली.
या रस्त्याचा वापर दररोज हजारो नागरिक व वाहनचालक चिंचवड स्टेशन ते आकुर्डी रेल्वे स्‍थानकाकडे जाण्यासाठी करतात. हा रस्ता पुणे - मुंबई महामार्गाला जोडतो. मात्र, या रस्त्यावर मोठ्या प्रमाणावर खोदकाम झाल्याने नागरिकांची गैरसोय झाली होती. विशेषतः आकुर्डी मैला शुद्धीकरण प्रकल्पासमोरील भागात खोदकामानंतर मोठा खड्डा पडला होता. गंगानगर येथील मुख्य रस्त्याच्या इतरही ठिकाणी विविध वाहिन्या, केबल दुरुस्त्यांसाठी खोदकाम झालेले होते. त्यामुळे संपूर्ण रस्त्याची अवस्था अत्यंत खराब झाली होती. ‘खोदकामामुळे गैरसोयीत वाढ; अपघाताचाही धोका, गंगानगर ते चिंचवड रेल्वे स्थानक रस्त्याची दुरवस्था’, हे वृत्त ‘सकाळ’मध्ये प्रसिद्ध होताच ‘अ ’ क्षेत्रीय कार्यालयाच्या उपअभियंता मीनल दोडल यांनी तातडीने या रस्त्यावर डांबर टाकून दुरुस्ती करून घेतली.