चिंचवडच्या इंदिरानगर भागात वारंवार वीज गायब

चिंचवड, ता. २३ : चिंचवड येथील इंदिरानगर परिसरात काही ठिकाणचा वारंवार वीज पुरवठा खंडित होत असून या समस्येमुळे नागरिक हैराण झाले आहेत. शनिवारी (ता. २१) रोजी दुपारी २ ते सायंकाळी ५ आणि रविवारी (ता.२२) रोजी सकाळी ११.३० ते १.३० तसेच दुपारी ३ ते ४ या वेळेत एकूण पाच ते सहा तास वीज बंद होती.
वीज पुरवठा खंडित झाल्यानंतर महावितरणच्या संपर्क क्रमांकावर वारंवार फोन करूनही प्रतिसाद मिळत नसल्याने नागरिक अधिकच संतप्त झाले आहेत. बहुतांश वेळेस फोन लागत नाही; लागल्यास ‘हॅलो- हॅलो’ म्हणत कट केला जातो किंवा फोन बंद आढळतो. परिणामी, तक्रार नोंदवायची कुठे आणि कशी ? , असा सवाल नागरिकांना सतावत आहे.
यासंदर्भात, तक्रार केल्यावर थेट वरिष्ठ अधिकाऱ्यांपर्यंत फोन करावा लागतो. त्यांच्या सूचनेनंतरच कर्मचारी घटनास्थळी येतात. काल देखील असेच झाले. वरिष्ठांना संपर्क साधून तीन तासांनी कर्मचारी आले. त्यामुळे कर्मचारी काम करत नसल्याच्या तक्रारी वाढत आहेत. या वारंवार खंडित होणाऱ्या वीज पुरवठ्यामुळे विशेषतः सिंगल फेजमुळे अनेक घरांमध्ये अधिक अडचणी निर्माण होत असून नागरिकांनी महावितरणकडे तातडीने उपाययोजना करण्याची मागणी केली आहे.

दिवसातून बऱ्याच वेळा सतत वीज जाण्याचे प्रमाण वाढले आहे. त्यामुळे कंपनीचे काम करण्यास अडचण येत आहे. कधी कधी लॅपटॉप चार्जिंग नसल्यामुळे आम्हाला याचा खूप त्रास होतो. कारण ऑफिसची महत्वाची कामे असतात. तरी महावितरणने यावर कायमस्वरूपी उपाय करावा.
- प्रेरणा म्हस्के, आयटी अभियंता

केबलमध्ये बिघाड असल्याने काम सुरू आहे. लवकरच या समस्येवर कायमस्वरूपी तोडगा काढला जाईल. तसेच नागरिकांच्या तक्रारींची दखल घेऊन आमच्या कर्मचाऱ्यांना फोनवर प्रतिसाद देण्याच्या स्पष्ट सूचना देण्यात येतील.
- प्रणोती पाटील, सहाय्यक अभियंता, महावितरण, बिजलीनगर