रस्टन कॉलनीसमोरील पदपथाच्या दुरुस्तीचा विसर

चिंचवड, ता.१३ ः गेल्या महिनाभरापासून बिजलीनगर ते चिंचवडगाव मुख्य मार्गावर रस्टन कॉलनीसमोरील रस्ता व पदपथ खोदलेल्या अवस्थेतच आहे. केबलच्या कामासाठी खोदाई केल्यावर रस्त्याची दुरुस्ती न झाल्याने नागरिकांना विशेषतः ज्येष्ठ नागरिक व महिला यांना अडचणींना सामोरे जावे लागत आहे.
रस्ता व पदपथावर पडलेले मोठमोठे दगड, खोदकामानंतर उघड्या अवस्थेत राहिलेले नाले यामुळे पादचाऱ्यांसाठी हा मार्ग धोकादायक बनलेला आहे. संध्याकाळी किंवा गर्दीच्या वेळेस नागरिकांना पदपथाचा वापर करता येत नसल्यामुळे त्यांना मुख्य रस्त्यावरून चालावे लागते. वाहने भरधाव वेगात धावत असतात. त्यामुळे अपघाताचा धोका वाढला आहे.
रस्टन कॉलनी व चिंचवडेनगर परिसरातील नागरिकांनी अनेकदा तक्रारी करूनही अद्याप कोणतीही ठोस कारवाई झालेली नाही. संबंधित विभागाने हे खोदकाम तत्काळ दुरुस्त करून रस्ता व पदपथ पुन्हा चालण्यायोग्य करावा, अशी मागणी परिसरातील नागरिकांतून होत आहे.
CWD25A01574